Mittwoch, 8. September 2010

Audit bei Merdi

- Bei uns war heit Audit -, hot de Peppi em Seppi in ehrem geliebte Bohnhofscafé verzählt.
- Was is'n des?
- Konzernaudit, besser gsaat.
- ? ? ?
- Des is noch meh wie Audit. So e Art Superaudit.
- Ich hun des Wort noch nie gheert.
- Genau waaß ich aah net, was des bedeit, awwer es klingt so noh'm rumänische "auzit", asso gheert. Un des geht net ohne Aushorche, Ausforsche.
- Haaßt des vleicht, dass dehr uf der Arwet ausgfrot werd wie in der Schul odder vleicht sogar wie in de Stasi- un Securitatezeite?
- Net genau so, awwer so ähnlich! Do is so e Beigelaafner mit lange Hoor un korzem Verstand kum un hot uns gfrot, was mer do mache.
- Ja is der blinn? Hot der net gsiehn, was dehr macht?
- Schun, awwer er hot jo wolle wisse, ob mer aah wisse, was mer do mache.
- Saa mol, hun die Leit bei eich nicks annres zu ton?
- Wahrscheinlich net. Un forr des kriet der bestimmt aah noch e scheene Lohn.
- Vun eirer Firma?
- Naah, halt vum Konzern, der wu ne gschickt hot. Es Schennste is jo, der war schun mol do, vor 10 Johr. Selmols hot er mich des Gleiche gfroot.
- Ja is der so vergesslich?
- Es gebt jo so e Behinderteprogramm im Konzern. Vleicht is des sogar e Arwetsplatz forr Vergessliche. Ich waaß des aah net. Awwer es gebt bei uns sowieso nicks, was es net gebt.
- Moonst halt mit dem Audi?
- Net Audi, Mensch, Audit haaßt der Schwachsinn. Audi un Audit sin zwaa paar Schuh, des soon ich dehr. Ich kann mer beim beste Wille net vorstelle, dass in der Firma mit de vier Ringe so etwas vorkummt.
- Na gut, Audit halt. Un was gebts do noch alles dazu?
- Jo, du musst nämlich wisse, dass unser Abteilung in drei Monat ufgeleest werd. No kummt de Bagger un reist alles weg, was der gut Mann un sei Kullegre - es ware aigentlich drei odder vier - jetz so pingelich kontrollert hun.
- Arwetst du vleicht i'me Narrehaus?
- Naa, bei Merdi halt.
- Sei mer net beeß, awwer ich hun noch nie gheert, dass e Dokter e Pazient uf Herz un Neere unnersucht, ob er aah gsund genuch is zum Sterwe.
- Ich hun der doch gsaat, bei Merdi gebt's nicks, was es net gebt.

De Seppi hot lang in sei Kaffeesatz gschaut un nicks meh gfrot. No hot er die BILD vor sich ufgschlaa un em Peppi vorgeles, dass de Sarrazin gsaat odder gschrieb hot, dass die Deitsche uf'm beste Wech sin, zu verdumme.

Keine Kommentare:

Kommentar veröffentlichen