Ich moon, wann e Blechmusik spillt, muss des net unbedingt
so klinge wie bei de Egerländer. Des geht doch gar net. Noh wäre die Egerländer
jo aah net die Egeränder, ich moon halt etwas Außergewähnliches. Awwer
wann die Sticker vun de Egerländer erklinge, no is des aah scheen, wann e annri
Kapell spillt. Und des is so, weil do halt noch echti Blechmusik gspillt werd.
Uf de Volksfeste is des oft nemmi so. Do werre sogar nammittachs, eigentlich
die traditionell Blechmusikzeit, schun Kapelle angascheert, die wu meh Show wie
Blechmusik mache.
Mei Fraa hot uf de Barthelmaark wolle. Do gebt’s angeblich
Gwärz, dee wu’s im Gschäft net gebt. Gut, hun ich gsaat, ich kumm schun mit. Im
Hinnerkopp hat ich die Blechmusik ghat. Es war jo noch Nammittach. Ich gehn do
nin, hun ich gsaat, wannst dei Sach host, kummst aah. Mei Fraa kennt des schun.
Ich sin in des Zelt gang, weil aus de annre hot’s schun gscheit gscheppert. Un
wirklich: Do hot noch e echti Blechmusik gspillt, ohne Gittares un Keyboards un
was waaß ich was net noch alles.
Die Hälft vum Zelt war schun reserveert forr Vereine. Do hun norr die Bänk un Tische zughorcht. Awwer
de Leit im Rest vum Zelt hot die Musik gfall. Ich hatt wennichst dee Eindruck ghat. Es
is un bleibt halt e Generationegschicht. Ich moon de Gschmack. Bei mer
perseenlich hot des aah immer etwas mit meiner Biografie zu ton. Wer mit der Blechmusik
ufgewachs is, so wie ich, der werd sich immer in sei Jugendzeit versetzt
fiehle, wann Blechmusik gspillt werd, echti Blechmusik. Irgendwie klingt’s
immer so wie selmols, wie ich noch jung war un aah e Blechmusikinstrument
geblos hun. Es war aah selmols net alles so wie bei de Egerländer. Oft war’s
sogar weit davun weg. Awwer es war scheen, immer scheen. Weil des war halt e
Musik, die merr irgendwie intensiver gspeert hot, ohne zu wisse forrwas.
Des is aah heit net annerscht. Wichtich is, dass merr sich
mit seiner Musik net scheemt. Weil des meecht haaße, dass merr e Stick, vleicht
sogar es greeßte Stick, vun sich selwer verlaachne meecht. So vill Selbstbewusstsein
sellt eigentlich e jeder hun. Des hun ich gspeert, wie die Musikante dort uf
der Biehne gspillt un gsung hun. Blechmusik (Video uf YouTube).
Mei Musik. Live, asso ganz unverfälscht.
Berns Toni
Keine Kommentare:
Kommentar veröffentlichen