Mittwoch, 15. Januar 2014

Vum Schinderhannes zum Schinderpetre

De Schinderhannes war im Hunsrück so bekannt wie bei uns in Johrmark de Schinderpetre. Wie ich jetz uf die zwaa kumm sin? Ganz oonfach: De Schinderhannes is uf Deitschlandtournee un jetz bei uns Uf der Schanz. Asso im Stadtmuseum. Ich sin dem Kerl eigentlich schun vor Johre begegnet, wie ich mol im Hunsrück Urlaab gemach hun un dabei meiner Urgukandl uf die Spur hun wolle kumme. Selmols hun ich mer die Chronik Bischofsdhron ghaaft, weil’s gscheide Dokumente gebt, die wu behaupte, dass mei Urgukandl, de Potche Pheder, vun Beruf Vergolder, im Dorf Bischofsdhron, im Johr 1741 gebor is. (Es gebt aah Quelle, wu’s haaßt, er wär eerscht zehn Johr späder uf die Welt kumm, im Johrmarker Ortssippebuch is gar ka Geburtsdatum ongewwe un die Doktre Franz Wilhelm un Josef Kallbrunner hun aah nicks Genaues gewisst.)

Im Johr 1748 is dort aah de Müllerhannes uf die Welt kumm. Des is so gut wie sicher. Der soll em Schinderhannes es Raawerhandwerk beigebrung hun. Awwer gwiss is nicks. Die Biografe un Historiker streide sich noch iwer dee Punkt. Uf jede Fall ware de Potche Pheder un de Müllerhannes Landsleit. Ob se sich aah noch perseenlich gekennt hun, waaß ich net, weil de Pheder hot sich 1770 uf de Wech ins Banat gemach. Selmols war de Butla, wie merr de Müllerhannes noch genennt hot, uf jede Fall noch in Bischofsdhron, weil dort sin zwischen 1768 un 1773 drei vun seine vier odder meh Kinn uf die Welt kumm. Kennt asso sein, dass se sich gekennt hun, de Pheder un de Butla.

Ich sin schun mol froh, dass mei Urgukandl mi’m Schinderhannes nicks meh zu ton hot känne hun. De Johannes Bückler, des war em Schinderhannes sei bürgerlicher Nome, is 1778 odder 79 gebor. So genau waaß merr des net. Do hot de Pheder vleicht schun im Temeswarer Dom sei Vergolderhandwerk ausgeiebt. Kennt jo sein, weil a’me odder i’meDom gebt’s immer Arwet, aah wann er schun iwer 20 Johr alt is.

De Schinderhannes is net weg. Der hot sei Unwese in de Wälder getrieb un so manche Raub begang. Des hot ne im 1803 zwar de Kopp gekost, ne awwer aah in die Reih mit so legendäre Figure – ob wirklich odder norr erfunn spillt do ka Roll – wie Robin Hood, Arsén Lupin, Capitano Angelo Duca, Zorro, Jesse James, Ned Kelly un noch annre ghob. Seim Lehrmoster Johannes Müller, asso Müllerhannes, is es net vill besser gang. Dee hun se aah um e Kopp kärzer gemach.

Die Ausstellung uf der Schanz versucht, des zu weise, was wirklich iwwer de Schinderhannes bewies ist. Un des is e ganzi Menge un recht intressant, muss ich schun soon. Die Wandtafle un zum Taal großflächiche Bilder sin in meh Kapitle gegliedert: Zeitgeschehen, Räuberbanden (17. – 19. Jahrhundert), Johannes Bückler - der „Schinderhannes“, Juliana Blasius (1781 – 1851) (die war drei Johr mit dem Vagabund zamm), Johannes Bückler und seine Kumpane, Reale und fiktive Räuberkollegen, Gaunersprache – Rotwelsch und Zinken, Verhör, Prozess in Mainz, Hinrichtung in Mainz, Das Skelett des Schinderhannes (des is so e fruckti Gschicht wie die mi’m Schiller seim Schädel) un Schinderhannes – ein Räuber wie er im Buche steht. Do kann merr noh zum Schluss lese: „Das Leben des Schinderhannes ist Quelle von so vielen Anekdoten, Halbwahrheiten, Umdeutungen, Phantastereien und hat ein solch schillerndes Kolorit, dass immer wieder Schriftsteller, Filmemacher und Künstler zu Neugestaltungen des Stoffes angeregt wurden und werden.“

In der Bischofsdhroner Chronik haaßt’s: „Der Schinderhannes gehört zum Hunsrück wie der Rübezahl zum Riesengebirge.“ Asso so hoch will ich jetz net greife. Awwer uf jede Fall kann merr mit gudem Gewisse soon, dass es uf der Welt (noch) Leit gebt, die wu an Johrmark denke, wann se de Nome Schinderpetre heere.

Es werd vun’re Raaferei im Dorf verzählt – des war in de 1950er Johre nicks Außergeweehnliches –, bei der de Schinderpetre oom was uf de Kopp gschlaa hot, dass der nemmi zu sich kumm is. Todschlach hun die Richtre gsaat un... em Schinderpetre sei Bruder, de Franz, zu johrelangem Arrest verurteilt. Der war nämlich aah bei der Raaferei dabei gewen un hot vor Gericht gsaat, er hätt zugschlaa un net sei Bruder. De Petre hatt selmols schun zwaa Kinn ghat un de Franz war noch leddich. Wann norr alle Brieder uf der Welt so e gegenseidiches Verhältnis hätte.

Schinderpetre
Computergrafik: Anton Delagiarmata
Im Unnerschid zum Schinderhannes war de Schinderpetre awwer ka Ausgstoßner. Mei, hot’s ghaaß, des is  bei der Raaferei halt schlecht gelaaf. Er war in die schwowisch Dorfgemeinschaft voll integreert, obwohl er gar ka Deitscher war, wann er sich aah Stein gschrieb hot. (Merr muss des rumänisch lese, asso de e un de i auslese un net e ei draus mache.) Mit seiner Es-Klanett hot ne e jeder im Dorf gekennt. Er hot’s eerscht beim Kiehalterche gspillt un noh beim Safer.

Des alles is mer dorch de Kopp gang, wie ich langsam vun Tafel zu Tafel gang sin un mich im Schinderhannes sei Lewe ingeles hun. Die Ufpasserin hot mich beim Nausgehn so e bissje, na ja, ich will net soon komisch, vun der Seit ongschaut. Ich moon, sie hot sich gstaunt weil ich so lang in der Ausstellung war. Gut, ich war jo aah weit weg un weit zrick. Des is des Scheene an ooner guder Ausstellung.

Berns Toni

Stadtmuseum Ingolstadt – Sonderausstellung „Der Schinderhannes – Schurke oder Held. Realität und Mythos eines Räubers aus dem Hunsrück und ein Beitrag zu den Schanzer Räubern“; 22. Dezember 2013 – 2. Februar 2014    

Keine Kommentare:

Kommentar veröffentlichen