Weider geht’s mit der owwer
Altgass, em alde deitsche Dorf, wie’s Seelersch
Margret sei Beitrach iwerschrieb hot. Wann merr vun Johrmarker
Siedlungsgeschichte redd, kummt merr an der Gass net langst, un dass
geschichtsbewusste Mensche stolz uf ehre Gass und die Vorfahre, die wu se
ongeleet hun, sin, kann merr leicht verstehn. So aah’s Margret: „Vill ware aus de Menzer Gegend, aa vun meine Urkukandle
selle die Seifferts/Seiberts drbei geween sin.“
Wann merr des alles so lest un merkt, dass merr (wann’s gut
gschrieb is) ufmol selwer in’re annrer Zeit is, noo versteht merr, forrwas die
Mensche – ich sin sicher, all, aah wann se’s aah net zugewwe – mit
fortschreitendem Alter immer liewer in ehre Kindheit mit Graawekatz, Graawekatz, ich freß de Speck un Brot! zrickkehre. Des
sin die kloone, versteckelte Kammre in unsrem Hern, die wu mer uns norr forr
uns inrichte, unser Rickzugsräume, in die nemol unser Lebenspartner ninkummt.
Glickliche Erinnerunge gheere mit zum Wertvollste, was
Mensche e Lewe lang mit sich rumtroon känne. Die hun net norr e Gsicht, merr
kann se aah rieche un schmecke. Es Seelersch
Margret hat so e glicklichi Kindheit ghat, wie se leider vill, vill Kinn uf
der Welt selmols net hadde un aah heit net hun. Es beschreibt in dem Buch aah,
wie so e scheeni Kindheit schmeckt: „Es wichtichste an de Peem ware for uns die
Maulpeere. Sieß ware se, wann se zeidich ware, manche weiß, annre so rosa
gsprickelt, des ware die dickste un beste. Annre ware schwarz. All hun biss’che
annerscht, awwer gut gschmeckt. Die schwarze ware seierlich un hun Flecke ins
Gwand gemach, die schwer raus gang sin.“ Ich sin mer sicher, es Müllersch
Herta hätt aah liewer so e „behütete“ Kindheit ghat, wie loonich uf der
Hutwadd die Kieh hiede. De Preis forr e Nobelpreis is nun mol hoch un oft sehr
bitter. De meiste vun uns Johrmarker Nohkriechskinn is der Preis erspart
geblieb.
Is jo alles scheen un gut, aah’s Seelersch Margret schaut in e jeds Haus korz nin un dahoom is aah
bei ehm dahoom. Awwer do halt’s sich dann doch zimlich lang uf. Wann merr als
Leser druf vorbereit is, dass es eigentlich vun Haus zu Haus, dorch’s ganze
Dorf
geht, noo will merr jo aah vorwärts kumme. Johrmark is halt groß. Manchesmol is
es beim Lese in dee zwaa Bicher so, wie wann merr sich wuhin dummelt un grad
noo vun jemand ufghall werd.
Uf die Art is mer aah es Goschy Lissje iwer de Wech gelaaf un hot mer lang un braat vum
Geiersch-Haus verzählt. Irgendwie sin ich aus der owwer Altgass nemmi runnerkumm.
Drum war ich froh, wie’s Seelersch
Margret - odder war’s noch es Goschy Lissje? – mich in de Kinnergarte
ningeloss hot. In oom vun dee Bettcher
hun ich aah mol gschloof. Un ganz wichtich: Do hat ich mei eerschtes Mensch.
Mer hun awwer noch net Dokterches gspillt. Ich sin’m norr immer nohgelaaf un
hun’s gepetzt.
Aus’m Kinnergarte raus, geht’s weider uf der Seit die
Altgass nunner. Es Margret hot do
Hilf kriet vum Maurer Sussi. Loonich
is so e Arwetspensum aah kaum zu meistre. Do kann’s noch so vill Abropptaich un Bohnesupp vun de Groß’che
gewwe. Aah’s Eichinger Leni – in der
Happgass
war’s noch die Wess Leni, aah do
sieht merr, dass Erinnerunge jung mache – springt zu Hilf. Es verzählt vun
seine Großeltre, die wu zwischen 1930 un 1947 owwe in der Altgass e
Kreislereigschäft hadde. Ja, mer, die noh’m Kriech Geborne, hun des private
Unternehmertum jo eerscht in Deitschland kennegelernt.
Berns Toni
Keine Kommentare:
Kommentar veröffentlichen