Selmols hun die meiste Johrmarker noch net in der Stadt gearwet.
Sie sin uf’s Feld gang. Uf’s eigne odder in de Tachlohn. In die Stadt is merr
mi’m Wohn gfahr. Zum Fratschle. Des war so die Zeit vor 1900. Allzu vill waaß
merr jo net iwer die Zeit vor der damalich Johrhunnertwende. Un des, wu merr
waaß, is zimlich widersprichlich.
Beim Demele-Pharre
kann merr zum Beispiel nohlese: „Als im Jahre 1863 der Ruin bevorstand und zu
befürchten war, daß ihre Immobilien subhastiert werden, dachte die Gemeinde vor
allem daran ihre Schule zu retten und überließ deren Gebäude durch
Gemeindebeschluß grundbücherlich der hierortigen Kultusgemeinde.“ Klingt net so
scheen, kann merr aah heit noch soon.
Awwer wuannerscht klingt’s schun besser. In dem Buch Jahrmarkt im Banat gebt’s e
chronologischi Reih mit de wichtichste Geschichtsdaten vun Johrmark. De Franz Urban hot die List zammgstellt.
Un dort kann merr vun der Zeit 1850 – 1914 aah lese, dass „etwa zwei
Generationen aus dem leidvollen Aufbau den ersten großen Nutzen ziehen können.“
Un dass „die Produkte aus Ackerbau, Weinbau und Viehzucht gedeihen bis zum
Überfluß. Das Gewerbe blüht.“ Des fallt ungefähr in dieselwet Zeit, heert sich
awwer wesentlich besser on.
Zu deer Iwerliwerung passt aah besser, was in der DETTAER
ZEITUNG, Nr. 23 vum 6. Juni 1897 zu lese war: „Die Temesvar-Lippaer Bahn wurde
am 29. Mai (Samstag) dem Verkehr übergeben, und der erste Zug ist an dem
genannten Tag um 1 Uhr 5 Minuten Mittags mit zahlreichen Passagieren in
Temesvar eingetroffen.“ Des war asso heit vor genau 120 Johr.
So um die Mittachszeit kännt der Zug in Johrmark geween
sein. Awwer wahrscheinlich is er net stehn geblieb, weil’s jo noch ka Bohnhof
gewwe hot. Der is eerscht im Johr 1899 gebaut wor. Wann des halt alles so stimmt,
wie’s in dem Buch Jahrmarkt im Banat drin
steht. Dort steht nämlich aah, dass die „Eisenbahnlinie Temeschburg-Lippa
(Radna)“ schun im Johr 1890 „eröffnet“ is wor. Des wäre immerhin siwe Johr
frieher, wie mer’s aus der DETTAER ZEITUNG wisse.
De Naschu wart uf sei Kundschaft. |
Sicher is norr, dass die Streck heit noch befahr werd un
dass de Johrmarker Bohnhof noch dort steht, wu er selmols hingebaut is wor.
Berns Toni
Keine Kommentare:
Kommentar veröffentlichen