Montag, 21. August 2017

E kurascheerter Mann – de Tanielpheder

Tanielpheder: G’schichte vun die korzi Ele un vun die langi Woche; Originalausgabe: Schwäbische Verlags-Aktiengesellschaft, Temesvar, 1928; Nachdruck: Privatdruck, Lahr, 2010; Bestelladresse: Peter Winter, Stettiner Str. 5, D-77933 Lahr; Tel.: 07821-41998; E-Mail: winter-lahr@t-online.de

De Tanielpheder, des war e kurascheerter Mann, kann merr soon. Wer gebt schun e Bankjob, wie merr heit soon meecht, uf un werd Zeidungsredakteer? De Tanielpheder war so ooner. Er hot in Szegedin, Budapest un Wien studeert un hot irgendwann, genauer im Johr 1928, do war er grad mol 30 Johr alt, Bank Bank sein geloss un die Die Pollerpeitsch. A schwowisches Witzblatt for g’scheiti Schwowe, for halbg’bild’ti Herrischi un for die v’dorweni Städtler gegrind. Frieher hot die im Banat e jeder Schwob gekennt. Do hot merr nämlich alles des lese känne, was de Tanielpheder uf seine ville Reise dorch’s Banat so alles gsiehn, gheert un aah selwer erlebt odder erfunn hot.

Tanielpheder war dem Mann sei schwowischer Zeidungsschreiwernome. In Wirklichkeit hot er Peter Winter ghaaß und stammt aus Ostre (herrisch Ostern). Un wer waaß, vleicht hätt er sich gar net an so e neii Zeidung rongetraut, wann sei Schweervatter, de Rausch-Bauer ka dicki Brieftasch ghat hätt. Awwer wie aah immer, es war gut, dass de Tanielpheder im banader Zeidungswese Fuß gfasst hot, weil angeblich hot jeder dreißichster Schwob ooni vun 12.000 Pollerpeitsche vun ooner Auflaach – so um die 800 Nummre solles jo in 16 Johrgäng geween sein -  ghaaft. Leider war noh’m Kriech Schluss. Die Kommuniste hun de Tanielpheder enteignet, un der hot, bis er 1969 vu’me Bsuch in Österreich nemmi Hoom ins Banat kumm is, als CFR-ist , Stroßroomer un Naachtswächter arwete misse.

So Idiote ware die Kommuniste. Die hun doch vun seine Gschichte iwer die Schwowe bestimmt ka oonzichi geles, un des Bichlche G’schichte vun die korzi Ele un vun die langi Woche, des wu de Thanielpeder glei am Onfang vun seiner Zeidungsmacherkarriere rausgebrung hot, hadde se bestimmt aah net vor ehre Aue ghat. Do hädde se, die bleede Kommuniste, lese känne, was forr stramme Kerle ehre nationali Minderheit im Banat ghat hatt.

27 schwowische Gschichte, korz awwer saftich, un e Gedicht sin in dem Bichlche. Un merr kann soon, es geht kreiz un quer dorch die Haad (vun der Heck is kaum die Redd) un dorchs Lewe uf de schwowische Därfer. Merr kann lese un immer dabei schmunzle odder hart lache, wie de Matz freie gfahr is, de Vedder Jakob Kur halt (de Racki hot schun immer sei Wech in die Dialektliteratur funn), wie die Kerweih in Nitzkydorf abgelaaf is odder in „Oschtre“, un noch allerhand.

Sogar Unonstänniches is uf der Haad passeert. So zum Beispiel bei’me Haseowed: „Wie ’s Esse rum war, is g’politisiert gin. Vun de Marjafelder, die ihre Glaawe wille loswere, weil ihne der Pharre net passt, vun de Oschtermer, die ihre Pharre fortg’jaat han un jetz schun froh wäre, wann se nochmol ane hätte.“ Do schau her! Do muss ich als neitraler Leser schun mol perseenlich werre un festhalle, dass mei Johrmarker gottesfirchtiche Leit ware; do wär so etwas gar net vorstellbar geween.

Des muss merr em Tanielpheder uf e jede Fall losse: Der Mann hot schreiwe känne. Er halt sich net lang mit dem Wie un Forrwas uf un verzählt die fruckteste Gschichte grad so, wie wann se wirklich passeert wäre. Un merr kann se heit noch lese. Sogar in lateinischer Schrift un net im alte Gotische, wie merr seinerzeit noch Bicher gedruckt hot.

De Tanielpheder is 1985 im Schwarzwald gstorb. Wivll vun der schwowisch Wuchezeidung Die Pollerpeitsch bis heit iwerlebt hun, waaß ich net, awwer e Nohdruck vun seim scheene Bichlche hot sei Nachkomme Peter Winter, des kännt de Sohn odder schun e Engelche vum Tanielpheder sein, vor siwe Johr rausgebrung. Saftiche banatschwowische Gschichte zu’me saftiche Preis, kann merr zammfasse. Wer 22,90 (mit Versand) Euro forr 139 Seide Schwowisch ausgewwe will (um wivll die Post seit 2011, wie ich die G’schichte kaaft hun, teirer is wor, waaß ich jetz net), der kann an de Winter Pheder schreiwe un noo selwer lese.
Ganz sporsame banatschwowische Leser muss ich do leider entteische: Ich hun des Buch bei Amazon net funn. Asso gebt’s wahrscheinlich nicks mi’m billicher kaafe.

Berns Toni

Keine Kommentare:

Kommentar veröffentlichen