Montag, 22. Oktober 2018

Politik in Johrmark

Gut, ich geb’s jo zu: Mer Johrmarker ware net grad die allerhellste Käpp. Wann ich des mol mit de Bogaroscher vergleich, no is des schun fast beschämend. Aus deer Ortschaft hun im Johr 1935 oonunneinzich (91) Gstudeerte im Banat ehre Wisse an Mann un Fraa gebrung: 9 Phatre, 7 Professore, 24 Lehrer, 23 Doktre, 7 Apotheker, 10 Indschineere, 9 Juriste un 2 Tierärzte. So vill Gschulte hun mer Johrmarker in unsrer ganzer Geschichte net rausgebrung.

Awwer … defoor hadde mer meh Maurer un Zimmerleit un noch meh Musikante. Soon mer’s mol so: net so gscheid, awwer fleißich, gschickt un talenteert. Un des is doch aah schun was. Die paar Gschulte, die wu in Johrmark gewohnt un gearwet hun, ware aah norr zum Teil Johrmarker. Einiche hun aus annre Ortschafte gstammt odder hun Naveta uf Johrmark gemach. Des gilt vor allem forr die Lehrer. Wichtich is awwer, dass die Gschulte, die wu in Johrmark gearwet hun, onstänniche un rechtschaffene Leit ware – asso die meiste.

Oone vun de alte Lehrer, die wu e paar Generatione Johrmarker es Lese, Schreiwe un Rechne beigebrung hun, war de Zimmre-Lehrer. Ich hat ne nemmi als Lehrer, awwer der Mann war forr vill Johrmarker noch e Perseenlichkeit, do war er schun lang in Pension. Un er wär mer jetz aah net unbedingt ingfall, wann ich net e Schriftstick in mei Computer kriet hätt, des wu e Bild uf die Politik in Johrmark in de 1920er Johre, asso vor fast hunnert Johr, werft. In dem Bericht - in scheener Schrift verfasst, awwer dorch’s Inscanne un Verwandle in e PDF-Datei doch stärk verwischt – spillt e gewisser M.Z. die Hauptroll. Ich hun versucht, dee Text – wer ne gschrieb hot, waaß ich net, er is net unnerschrieb – zu ennziffre. Normal toon ich mer die Arwet mit Schriftsticker, die wu net unnerschrieb sin, net on, ich les se meistens gar net dorch. Awwer weil ich des Gfiel hat, dass do e Johrmarker was ufgschrieb hot, der wu selwer noch in der Zeit gelebt hot, war ich doch uf de Inhalt neigeerich un will ne aah net forr mich loonich bhalle, weil ich schun immer der Meinung war, dass norr des e Wert hot, was aah unner die Leit kummt. Dazu passt noch, dass ich de Verdacht hun, dass der M.Z. aus dem Schriftstick unser Altlehrer Michael Zimmerer (1883 - 1982), asso de Zimmre-Lehrer, is, der wu aus Moritzfeld gstammt hot un seit 1905 in Johrmark Lehrer war. Doch jetz es eerscht mol de Text, an dem wu ich nicks verännert hun:

Politische Begebenheit aus Jahrmarkt

Bei den Parlament Wahlen wurde immer durch Pakt mit rumänischen Parteien auch Deutsche gewählt. Vom Banat 1 bis 2 Senatoren und 2 bis 3 Abgeordnete, insgesamt waren es 15 Mann mit den Siebenbürger.
Um den Frieden in der Kulturgemeinschaft zu wahren, wurde auch Dr. Michael Kausch aufgestellt und gewählt. Nach kurzer Zeit jedoch ist Dr. Kausch aus der deutschen Parlamentspartei ausgetreten und ging in die rumänische „Liberale Partei“ – Brăteanu.
(Hier) Damals bemängelte M.Z. das bei einer Gelegenheit im Bauernverein und erklärte dies als Volksverrat. Einige Jahrmarkter, Z.P., B.J., L.P., L.M., T.N. und R.M. haben diese Bemerkung Dr. Kausch mitgeteilt, worauf dieser beim Bezirksgericht geklagt hat. Vor der Gerichtsverhandlung sagte der Anwalt Dr. Kausch, er zieht die Klage zurück, wenn M. Z. ihm 1000 Lei bezahlt. Z. war nicht geneigt. Bei der Verhandlung sagte der Richter: „Da ist die Regierung beteiligt, die Klage gehört vor das Kriegsgericht. Der Anwalt Dr. Schmitz sagte seinem Mandant, beim Militärgericht würde eine Verurteilung erfolgen und man dagegen nicht appelieren, er meine die 1000 Lei bezahlen. Nun verlangte der Anwalt von Dr. Kausch 2000 Lei. Dr. Kausch hat in seinem Wochenblatt berichtet, L. M.Z. hat für das aufstellende Brăteanu-Denkmal 2000 Lei gespendet.
So waren diese politischen Feindschaften von großem Nachteil für die deutsche Volksgruppe. Dr. Kausch hatte auch für die Verstaatlichung der r.k. Volksschule agitiert. Seine Jahrmarkter Anhänger zahlten keine Kultursteuer.
Solche politischen Kuriositäten gab es mehrere in Giarmata, doch das Wasser am Großen Brunnen lief weiter.

Nohdemm wu ich des Ganze einigermaßen leserlich hinkriet hat, hun ich versucht, die Gschicht e bissje zeitlich inzuordne. Des mit de deitsche Abgeordnete im rumänische Parlament is jo nicks Neies. Des kann merr aah im Johann Böhm seim Buch Die Deutschen in Rumänien und die Weimarer Republik 1919 – 1933 nohlese: „Der politische Machtträger der zwanziger Jahre nach dem Zerfall der Konservativen war die ‚National-Liberale Partei’ (Partidul National-Liberal). Da die deutsche Minderheit stets die Regierungspartei unterstützte, kam es zu mehreren Wahlbündnissen zwischen der ‚Deutschen Parlamentspartei’ (nach 1929 ‚Deutsche Partei’) und der ‚Liberalen Partei’. Die Führung der Liberalen lag unbestritten in den Händen der Familie Brătianu.“ Asso wisse mer schun mol, dass mer in de 20er Johre sin.

Im März 1922 ware in Rumänien Parlamentswahle un do is de Dr. Michael Kausch (1877 – 1942) im Wahlkreis Neuarad als Abgeordneter ins rumänische Parlament gewählt wor. Schun e Johr no em Kriech (1919) war er der Deutsch-Schwäbischen Volkspartei (aah noch Deutsche Volkspartei odder späder Deutsche Partei genennt) beigetreet un hot dort de Vorsitz iwernomm. Die Partei hot mit de Siebenbürger Sachse eng zammgearwet un hot forr e gudes Verhältnis zum rumänische Staat plädeert. (Selmols hot’s im Banat awwer aah noch die Schwäbische Autonomiepartei gewwe, die wu es Banat hot wolle selbststännich mache. Die hat selmols meh Onhänger ghat wie em Dr. Kausch sei Partei.) Wie des in der Politik awwer so is, wechsle Politiker die Pheer, wann de Wind vun wu annerscht blost. 

Im Johr 1924 hat merr in Rumänien de Eindruck ghat, dass de General Averescu mit seiner Volkspartei (Partidul Popular odder Liga Poporului) die Nationalliberale vum Ion I. C. Brăteanu vun der Macht verdränge kännt. Uf des hin hun Führungspersone in der Deutsche Partei sich vun de Nationalliberale abgewendt un uf de Averescu gsetzt. Des hot awwer de Siebenbürger Sachse gar ner gfall. Die Folgen kann merr beim Historiker Böhm nohlese: „Die Führung der Siebenbürger Sachsen, die diese Bewegung unterstützt hatte, sah sich genötigt, Kausch, Jahn, Orendi-Homenau und Alscher als ‚Abtrünnige’ des Deutschtums in Rumänien abzustempeln. […] Es ging hier nicht um Ideale und politische Zielsetzungen für das Wohl der Rumäniendeutschen, sondern um persönlichen Haß, der die Deutschen in Rumänien zersplitterte.“

Ka scheeni Gschicht. Un die geht mi'm Austritt vum Dr. Michael Kausch aus seiner eigner Partei weider. Im selwe Johr, is er, de Dr. Kausch, noh in die National Liberal Partei (Partidul Național Liberal) vum Ion I. C. Brăteanu ingetreet. Awwer des hot selmols unsrem Johrmarker Landsmann M.Z. gar net gfalle wolle. Sei eigni Meinung is ne awwer teier zu stehn kumm, weil e paar annre Johrmarker gepetzt hun. Un des alles hot sich im Johr 1924, asso genau vor 94 Johr, in unsrem so friedliche Dorf abgspillt.
De Zimmre-Lehrer
mit seiner Schulklass
im Johr 2010 in Johrmark

Bleibt bloß noch zu kläre, wer der kurascheert M.Z. wirklich war. Ich waaß es aah net. Wann’s awwer - noh meiner Spekulation - de Zimmre-Lehrer war, noo muss ich schun noch druf soon, dass der Mann aah schun darum Kurasch ghat hat, weil de Dr. Kausch Sektionsrat im Banat war un de Auftrag ghat hat, es deitsche Schulwese zu organiseere, des wu jo noh der Madjarisierungszeit net grad im beste Zustand war. So gsiehn, war de Dr. Kausch in der Schulhierarchie schun e bissje hächer ongsidlt wie unser Johrmarker M.Z.. Awwer wer waaß, vleicht kummt jo doch mol jemand hinner des Geheimnis in der Johrmarker Politik aus de 1920er Johre.

Berns Toni

Keine Kommentare:

Kommentar veröffentlichen