Mittwoch, 6. Oktober 2010

De Seppi, de Peppi und die Schwowesecuritate odder Wedder mol net gut hingheert

- Mensch Seppi, hot de Peppi gsaat, wie schaust'n du aus? Merr moont jo grad, du meechst die Last vun der ganz Welt uf'm Buckl troon.
- Ich moon, jetzt krien se mich, hot de Seppi mit ohnmächticher Stimm geantwort un sich meh uf de Barhocker falle geloss wie hingsitzt.
- Wer kriet dich?
- Die Securitate.
- Du spinnst doch, die gebt's doch schun seit 20 Johr nemmi.
- Doch, do in Deitschland, die Schwowesecuritate.
- Saa mol, host du heit schun was getrunk?
- Naa, awwer jetz brauch ich was. Bedienung! Einen Brandy bitte!
- Ja, saa mol, bist du i'me Westernfilm?
- Ich soon der, des is noch vill schlimmer.
- ? ? ?
- Mei Arwetskulleger is heit morjet mit're sehr, sehr wichticher Miene zu mer kumm un hot gsaat: Jetz hun se dich. Dei Fall is schun beim Vorstand. Ich war perplex un hun gsaat, des muss e Fehler sin, ich mach doch mei Arwet onstännich - so weit's halt noch in meine Kräfte leit. Net der Vorstand, der anner, der vun der Landsmannschaft, hot er no druf gsaat, un sei Stimm hot ufmol ganz geheimnisvoll geklung. Ich awwer sin eerscht recht aus alle Wolke gfall. Awwer er war so, ja wie soll ich soon, direkt ufgeregt, un es is wie e Wasserfall aus seim Maul kumm: Jetz stoppe se der's Maul! Wie er gsiehn hot, wie ich no selwer vor Staune un Entsetze es Maul bis an die Ohre ufgeriss hun, un ka Wort meh rausgebrung hun, was merr jo vun mer net grad geweent is, muss er jo doch bemerkt hun, dass ich vleicht jo wirklich net waaß, vun was er do redd, un hot mit're Frage nohgholf: Was host'n wedder Schlechtes iwer die Schwowe im DONAUKURIER gschrieb? Ich hat die vorrich Wuch e Anzeige drin ghat, dass ich mei Basfliglhorn verkaaf, hun ich noh doch rausgebrung. Des is doch nicks Schlechtes. Na dann geht's halt um was annres, hot er druf geantwort un nochmol betont, dass se mich jetz krien.
- Saa mol, hot deim Kulleger e Spatz in's Hern gschiss? Bedienung! Ich glaube, ich vertrage jetzt auch einen Brandy.
- Naa, naa, des is ganz ernst, hot de Seppi mit ziddricher Stimm gsaat. Mei Arwetskulleger is Deputat in der Organisation un waaß, was dort abgeht.
- Jetz spinnst awwer wirklich. Der hot norr sei Gaudi mit der gemach. Was hot'n dei Landsmannschaft, odder wie der Verein haaßt, mit der Securitate zu ton.
- Du kannst des net wisse, wie schlimm die sin. Wann du ehne net noh'm Maul reddst, mache se dich fertich.
- Wer macht dich fertich, die Securitate odder die Landsmannschaft?
- Des hun ich mei Arwetskulleger jo aah gfroht, awwer er hot norr immer gsaat: Du werscht schun siehn! Un ich waaß, die drehe de Spieß jetz rum. Ooner hot in der Zeidung sogar gsaat, die friejer Verfollichte sin jetz die Staliniste. Des haaßt doch, dass die Spitzel vun friejer jetz die Opfer, die Rächer vun heit sin. Jo, so hun ich des verstann. Die schloon wedder zu, des soon ich der, du werscht schun siehn.
-Mensch Seppi, jetz reiß dich zamm. Du verschlapperscht jo dei Brandy. Was genau, awwer ganz genau, hot dei Spezi doch gsaat?
- Nicks Genaues. Er hot jo norr gewisst, dass die mer jetz de Garaus mache werre.
- Wer, die Securitate odder die Landsmannschaft?
- Vleicht alle zwaa. Waaß merr, was do laaft?

Ich waaß nateerlich net, was an der Gschicht do dron odder aah net dron is. Ich war im Bohnhfscafé - e integreerter schwowischer Migrant macht aah so etwas ab un zu - un dort hun ich newer dee zwaa, em Seppi un em Peppi, an der Bar gsitzt un nolens volens hun ich des alles gheert, obwohl ich jo vun Natur aus gar net so neigeerich sin. Leider hat ich e Termin ghat - aah des gheert zu'me integreerte schwowische Migrant -, so dass ich fort hun misse un jetz net waaß, wie des Ganze ausgang is - ob de Seppi de Peppi odder de Peppi de Seppi homgebrung hot, weil gelallt hun se zum Schluss schun alle zwaa. 

Uf jede Fall versprech ich Eich, dass ich mich bei meiner nächst Einkehr im Bohnhofscafé noh dee zwaa umschaue werr. Un vleicht verwisch ich jo e Platz in ehrer Näh - net weil ich so neigeerich sin, sondern forr Eich, weil Dehr jo jetz mit're halwer Gschicht auskumme misst. 

Un wann de Peppi noh norr loonich dort sein sellt - ja, noh hun se de Seppi tatsächlich abgholl.

Keine Kommentare:

Kommentar veröffentlichen