ich froo mich immer

 

- gedicht im johrmarker dialekt -

forrwas vergeht die zeit

im violinandante

schneller wie im

arwedsakkordallegro

[uf der schanz, 1993]

berns toni

Lesung uf YouTube

nimand un die annre

 

- gedicht im johrmarker dialekt –

forrwas will nimand

forr die annre was mache

wer losst sich heit schun gere auslache

nateerlich sin’s die annre

die wettre un schenne

weil nimand nicks uf die fieß will stelle

so geht’s noo langsam

awwer sicher berchab

bis gar nimand meh forr die annre was macht

 [uf der schanz, 1993] 

berns toni

Video uf YouTube

„Kleidersammlung“

- Gedicht im Johrmarker Dialekt -

De Jankel hängt

am Zappebreet,

alt un abgschoss,

schun genäht.

E neii „Kleidersammlung“

steht ins Haus,

gudes Gwand

wannert sackweis naus.

De Jankel bleibt

am Zappebreet:

Rosticher Stacheldroht

tot ewich weh.

[Uf der Schanz, 1993]

Berns Toni

Worterklärungen:

- Jankel, de = der Janker (in Bayern & Österreich für wollene Trachtenjacke)

- Zappebreet, es = das Zapfenbrett, das Kleiderhackenbrett

Lesung uf YouTube

Kotstoonmache

- Gedicht im Johrmarker Dialekt -

Vatter un Motter sin Kotstoon mache,

Dort, wu oweds die Grotte quake.

Die Schwalme baue ehre Nist mit Dreck,

Wann die Kuh es Gras uf der Hutwatt fresst.

Vatter un Motter schaue mied in de Mond,

Schwalme un Kuh sin aah schun dehoom.

Norr die Grotte heert merr noch quake:

Morje geht ’s wedder zum Kotstoonmache.

[Uf der Schanz, 1993] 

Berns Toni

Worterklärung: Kotstoon = aus Erde, Wasser und Spreu gefertigte Bausteine

Lesung uf YouTube

vun dedoom hoom

- gedicht im johrmarker dialekt -

- mer fallt de plafon uf de kopp

wann ich zu lang dehoom sin

mich fresst ’s hoomweh uf

wann ich zu lang net dehoom sin

mer dreht sich de maa rum

wann ich an rumänien denk

mer dreht sich de maa rum

wann jemmand iwer johrmark schennt –

- mach dann was ’d net losse kannst

un fahr in gotts nome hoom

schau ob meim vatter sei haus noch steht

ich hun do unlängst davun getroomt –

[uf der schanz, 1993]

berns toni

Video uf YouTube

E oonfache Reim

- Gedicht im Johrmarker Dialekt -

Les mich oonfach

Bis an ’s Enn,

Wannst noher aah

E bissje schennst:

„Zu altmodisch,

Ohne Substanz.

Net so vill Herz,

Meh Verstand!“

Kumm, loss die Arwet,

Die groß Politik,

Wann ich der net gfall,

Such der e annres Gedicht.

Wie mich gebt ’s Millione

Uf unsrem Planet:

Trauriche un lustiche,

Wie mer ’s grad meecht.

Versuch norr oomol,

Net so gscheit zu sein,

Un du finnst bestimmt

E liebliche Reim.

Gedichter sin

Wie Phefferkere:

Mit Moß in der Supp,

Kann nicks passeere.

[Uf der Schanz, 1993]

Berns Toni

Lesung uf YouTube

Hoomweh im November

- Gedicht im Johrmarker Dialekt -

Die Wolke ziehe immer tiefer,

Merr sieht die Kurake hoomwärts flieje.

Mei Kinn schaue mich verständnislos on,

Wann ich vum Brickenaer Wald laut troom.

No verzähl ich ne vun triewe Täch,

Vum Zuhacke, Rampasch un friehem Schnee.

Oomol hot mei Mädche gfroot:

„Wie is des, wann merr Hoomweh hot?“

„Du willst doch oft naus spille gehn,

Wann 's draus aah stirmt un reent.

Noo stehst am Fenster un wartst uf die Sunn,

Un wartst, un wartst, bis de Owed kummt.“

[Uf der Schanz, 1992]

Berns Toni

Worterklärungen: die Kurake = die Krähen // Brickena = Bruckenau, ein Dorf im Banat // Rampasch = Federweißer

Lesung uf YouTube

Kloone Keeniche im Jammertal

 - Gedicht im Johrmarker Dialekt -

Die Mensche jammre,

weil se mit Scheiklappe schaue.

Wann ’s um Geld un Wohlstand geht,

glanze neidisch ehre Aue.

„Dem geht ’s gut,

der hot meh wie ich.

Mit mer, norr mit mer

is unser Herrgott ungerecht.“

Schaut Nachrichte, Leit,

oomol am Tach:

Es gebt Millione Mensche,

forr die is immer Naacht.

Wer sich mit dee vergleiche will,

werd schnell erkenne:

E jeder vun uns

is e klooner Keenich.

[Uf der Schanz, 1995]

Berns Toni

Lesung uf YouTube

Schnadahüpfl - Schnaderhüpfl

-  Bayrisches Volkslied iwersetzt in de 

Johrmarker Dialekt -

Du flacksblondes Mädche

ich hun dich so gere,

ich meecht forr dei Flackshoor

e Spinnrad glei werre.

Ich kenn aah e Mädche,

des hot so e Gang,

mit oom Fuß tot ’s mähe,

mi ’m annre macht ’s zamm.

Un ’s Mädche verlosse,

des tot arich weh,

do schwemme die Aue

wie die Fischcher im See.

Es Bussle macht schecklich –

mei Motter hot ’s gsaat –

drum hun ich so etwas

bis heit nie gemach.

Daß Bussle so schlecht is,

des is norr gedicht,

sunst hätt jedes Mädche

e scheckliches Gsicht.

Un wann mei Mensch heirat,

was bleibt no forr mich?

Ich hun no e Dreck

un e Photographie.

Mei Vatter war Tischtler,

ich war e Falott,

die Wieh stammt vum Opa,

mei Arwet steht do.

[Uf der Schanz, 1995]

Berns Toni

Worterklärungen:

Flacks = Flachs

arich = sehr

schecklich = scheckig

Mensch = in Jahrmarkt gebrauchter Mundartausdruck für Freundin

Falott = schlimmer Bube

Wieh = Wiege

 

Lesung uf YouTube

 

Kerweihspruch forr e Kinnerkerweih

 - Gedicht im Johrmarker Dialekt -

Griß Gott, liewe Leit!

Es is scheen, dass dehr uf die Kerweih kumm seid.

Mei Vatter hot schun immer gsaat:

Es eerscht Kerweihbu un no Soldat.

Awwer so lang soll ich warte,

uf des scheene Mädche im Nochberschgarte?

Zehn Johr sin jo wirklich schnell weg,

awwer wer waaß, ob ’s no noch Kerweih gebt.

Drum sin ich schun heit uf die Kerweih kumm

un hun mei Mädche glei mitgebrung.

Liewer stell ich ’s eich jetz vor im schwowische Rock,

wie späder mol in der Blue-Jeans-Hoss.

Liewe Leit,

mei Kerweihspruch is noch vill länger,

awwer aah mei Strauß werd immer schwerer.

Drum war ’s forr heit mei letzti Stroph

De Rest soon ich im nächste Johr.

Un mei schwowische Rosmarein

schenk ich jetz em bayrische Enzianverein.

[Uf der Schanz, 1994]

Berns Toni

Lesung uf YouTube

Schunn wedder Kerweih

- Gedicht im Johrmarker Dialekt -

Der oon hot im Sauerland gewohnt,

Der anner war in Trier dehoom.

Sogar aus Schlesien sin se kumm,

Un manche hun aah bayrisch gsung.

So war des vor zwaahunnertfufzich Johr,

Wie deitsche Siedler ins Banat gezoo.

Do hot oft ooner de annre net verstann

Un gemoont, norr er wär aus’m deitsche Land.

In der Not hot merr sich schließlich doch verstann

Un’s Resultat: e neier Volksstamm.

Schwowe hot merr se ball genennt,

Die deitsche Baure uf’m Jungfraafeld.

Kerche sin in de Himmel gewachs,

Un Kerweih hot merr aah gemach.

No is de Ceau an der D-Mark-Sucht krepeert

Un die Schwowe sin mit der Kerweih retreert.

Jetz hun die Deitsche des Spektakel do,

Ich awwer ärjer mich schwarz un bloo.

Nicks meh is so wie dehoom,

Des scheint mer wie e beese Troom.

Ich will Kerweihmäd un –buwe siehn,

Un net Verheirate un Kinn.

No laafe die Kloone aah noch hinnenoh,

Dee Kerweihvatter beißt doch e Floh.

Sogar e Fohne schleppe se rum,

Merr moont de eerschte (1.) Mai wär kumm.

Unser Kerweihhiet ware vill schenner

Un unser Mäd hätt der eich onschaue känne!

Do die sin e jeds annerscht ongezoo.

Was is’n des forr e fruckti Mod?

Aah de Ingolstädter Richter holle se ab

Un schleppe ne ans Kerweihfass.

Dort kriet er e Spruch rum die Ohre ghaut,

Dass ’m es Schwowische aus de Aue schaut.

So e Schmarre: Hut un Kopptuch verlose se dort.

Wer brauch heit noch e gedeckte Kopp?

Samstachs hot merr die Kerweih ausgegrabt

Un noh vier Täch Kerweih Tach un Naacht

Dienstachs wedder ingegrabt.

Des kannst vergesse in Ingolstadt,

Die hun die Kerweih so korz gemach,

Dass Aus- un Ingrawe de Tritz schafft mit oom Marsch.

Wann ich aah vorher waaß wie’s is,

Dortsein is forr mich e Pflicht.

Es kännt sich jo doch was geännert hun,

No wär grad ich noher der Dumm.

Liewe Leit,

Ich moon mer treffe uns all

- In Johrmark war’s am Bieckestall –

Un losse die schwowisch Kerweih lewe.

Des gebt neie Stoff zum Kritiseere!!

Na dann, bis zu der Kerweih!

Eier Grandler Toni aus Ingolstadt,

Gebor wu schun de Prinz Eugen Dorscht hat ghat.

[Uf der Schanz,1992]

Berns Toni

Worterklärungen: Kerweih = Kirchweihfest, Ceau = Ceauşescu, retreert = abgehauen, aus dem Staub gemacht, Tritz = Name eines Kapellmeisters, Bieckestall = Schimpfwort für einen Kerweihveranstaltungsort in Jahrmarkt in den Jahren der Doppelkerweih (1974-1984)

Lesung uf YouTube

E Rackijohr

- Gedicht im Johrmarker Dialekt -

Der Oma sin fast

die Träne kumm.

Schuld war wedder

mol e Sturm.

Alles leit uf der Erd,

es ganze Fratschelsach.

Aprikose un Praume

misse ins Fass.

Norr de Ota

lächelt verschmitzt,

holt mich an der Hand,

sei kloone Knirps:

Macht ka Lebdach,

noch is nicks vlor.

Desjohr gebts halt

e Rackijohr.

[Uf der Schanz, 1992]

Berns Toni

Worterklärungen: Racki = Schnaps; Fratschelsach = Marktware; Praume = Pflaumen; Ota = Opa; Lebdach = Krach, laute Unmutsäußerungen 

Lesung uf YouTube

Do gehn ich net hin

 Gedicht im Johrmarker Dialekt

- Gehst du uf’s Bal heit owed?
Do sin doch die Kulturtäch vun de Banater Schwowe. -

- Du musst err sin, freitachs oweds is doch ka Bal.
Was die dort mache is norr e Kulturprogramm.
Die singe un geie so jammrichi Musik,
wie merr se manchesmol am Fernseh sieht.
Sogar vun dem Mozart spille se e Lied.
Weger dem hun ich mol in der Schul e Vierer kriet.
Na, na, do gehn ich net hin. –

- De Samstach Morjet hun die Musikkapelle Konkurs. -

- Die sin doch vruckt!
Wer brauch schun vor Mittach de ehre Geblos?
Ins Saal sitze in aller frieh?
Na, na, do gehn ich net hin. -

- Vu ’me Dichter un ’re Ausstellung war aah die Redd. -

- Der Tisch is norr forr die ewwre Zehntausend gedekt.
Bilder hun ich schun genuch in meim Lewe gsiehn.
Na, na, do gehn ich net hin. -

- Namittachs mascheert de Trachtezug in die Kerch. -

- Des hun ich schun immer gfercht.
Die Einheimische wolle des doch gar net siehn.
Na, na, do gehn ich net hin. -

- Bei der Kundgebung werd e Minister redde. -

- Dem sei Gekwatsch werr ich mer net onheere.
Des hot doch alles gar ka Sinn.
Na, na, do gehn ich net hin. -

- Oweds werd Heimatabend gemach,
gsung un getanzt in schwowischer Tracht. –

- Forr was muss des grad samstachs sin?
Do will ich am Fernseh de Gottschalk siehn.
Na, na, do gehn ich net hin. -

- Zum Schluss is aah noch Tanz forr alles.
No spille die Johrmarker Musikante. -

- Forrwas hun se net die annre gholl?
Wie haaße die norr? So etwas mit Boys.
Awwer is jo wurscht! De Samstachowed sin ich mied.
Na, na, do gehn ich net hin. -
 
[Uf der Schanz, 1992]
Berns Toni

Lesung uf YouTube

Des Land

 - Gedicht im Johrmarker Dialekt -

Was is des forr e Land,

Wu du großgewachs bist?

Ich holl des Kloon an der Hand

Un schau ’m ins Gsicht.

Die Sunn is oweds

Hinner der Landstroß verschwunn,

Un wann de Wind gang is,

Hot’s no de Schweinställ gstunk.

Die Leit?

Die ware grad so wie do:

Gut un schlecht,

Ehrlich un verloo.

Norr de Mond,

Der hot’s schenner ghat:

Dort hot ’m ka elektrisches Licht

Konkurrenz gemach.

[Uf der Schanz, 1992]

Berns Toni

Video uf YouTube

Die Owebank

 - Gedicht im Johrmarker Dialekt -

Kumm, sitze mer uns uf die Owebank,

Die halt uns die Buckle scheen warm.

Holle mer uns an de Hänn un verzähle vun frieher,

Vum Pheife un Bussle, vum Wachse und Bliee.

Kumm, sitze mer uns uf die Owebank,

Mei Gedanke sin wie de Owed so lang.

Sie gehn weit un weider zrick:

Irgendwann war aah des Haus e armi Hitt.

Kumm, sitze mer uns uf die Owebank,

Ich les der die Zukunft aus der Hand:

Du werscht deine Kinn mol erkläre misse,

Daß merr uf ’re Owebank sogar hot känne sitze.

[Uf der Schanz, 1992]

Berns Toni

Lesung uf YouTube

mei mottersproch

- gedicht im johrmarker dialekt -

es is net leicht

forr nimand zu schreiwe

es is net leicht

du selwer zu bleiwe

dee kenn ich

der is gstorb

des waaß ich

wedder e stick mottersproch

die zeit hot ka zeit

uf uns zu warte

was iwrich bleibt

sin gstichelte karte

die sin im wind

mol do mol dort

wie e phonetisches wild

zwischen a un o

[uf der schanz, 1991]

berns toni

Lesung uf YouTube

Gui Nacht

 - Gedicht im Johrmarker Dialekt -

Die Sunn brennt uf de Gewl,

Die Ros im Hof is wellich,

De alt Linneboom is nemmi.

Mer wär liewer, es wär newlich.

Die Glocke sin schun lang verstummt,

Die Zeit steht still im Kercheturm.

E Fremder dreht die Gasse rum:

Alles leer, verloss un stumm.

Im Grawe leit e frissni Tracht,

Die Krotte jammre ohne Kraft.

Forrwas hun ich mich uf de Wech gemach?

Jetz soon aah bei uns die Fichs Gui Nacht.

[Uf der Schanz, 1991]

Berns Toni

Worterklärungen: Gewl = Giebel, wellich = welk, 

Krotte = Kröten, Fichs = Füchse, forrwas = warum

Lesung uf YouTube

Sunneunnergang

 - Gedicht im Johrmarker Dialekt -

Pechschwarz is de Boom
In der feierrot Kugl.
Leer is die Landstroß
Vor’m abgemähte Buckl.

E Mann mi’me Kupper
Geht langst de Boom,
Geht iwer die Stroß,
Steit iwer de Buckl.

Die Sunn backt Lezelter,
Heert er sich son,
Die Engle hun dort owwe
E sichres Hoom.

Es letzte Mol
Dreht der Mann sich um.
Es Dorf hinner ehm
Is dunkel un stumm.

Sei letzte Freind
Hot er gester begrab.
Im Dorf saat nimmand meh
Gun Tach.

Die Feierkugl is verschwunn,
Der Mann muss sich die Aue putze.
Ab sofort will er in der Zukunft
Alles Vergangne suche.

[Uf der Schanz, 1990]
Berns Toni

Lesung uf YouTube

Awwer

 - Gedicht im Johrmarker Dialekt -

Schau vor, awwer net uf die annre,
wanns’d die Heimat hinner der host.
Sei net leichtsinnich, awwer aah net unwillich,
wann’s ab un zu mol Nerve kost.

Alles musst deine Kinn net ongehn losse,
awwer vergess um Himmels Wille net,
dass sogar die Blumme schenner bliee,
wann merr alle Tach mit ne redd.

Geld is gut, awwer denk aah dron,
die beste Kumrade sin net immer die,
die wu norr hoorgenau rechne kenne:
Wann’s sich auszahlt, gehn mer hin.

Mach der ’s Lewe so scheen wie meeglich,
awwer schau aah uf de alte Mensch newer der.
Aah er is wie e Blumm, die mit Wärter un Luft
drinn noch bliet, wann's drauß aah schun schneet.

[Uf der Schanz, 1989]

Berns Toni

Lesung uf YouTube