E Johrmarker Kuratorin un e multiethnisches Dorfmuseum

Es gebt vill Ortschafte, ob Städt odder Därfer, dee ehre Mitt is viereckich, meistens quadratisch odder rechteckich. Manche, wie zum Beispiel Herrnhut in der Oberlausitz, hun sogar noch e Kerch in der Mitt. Es handelt sich bei der Onsiedlungsweise um sogenannte „Plansiedlungen“, die wu asso vum Grundriss uf so geplont un ufgebaut sin. Herrnhut ist 1772 uf em Grund un Boden vum Graf Nikolaus Ludwig von Zinzendorf (1700 – 1760) gebaut wor, un zwar vun de „Böhmischen Brüder“, e in Böhmen und Mähren onsässichi protestantischi Bruderschaft, die wu am Onfang vum 18. Johrhunnert aus der Habsburger Monarchie vor der Gegenreformation flichte hot misse un do Zuflucht funn hot. Selbstverständlich bestehn so Ortschafte nett ewich aus ehrem architektonisch spezifische Mittelpunkt. Der bleibt awwer oft als Markenzeichen vun ‘re Ortschaft erhall, ganz gleich wie die sich ins Umland entwickelt.

Seltener sin so Ortskere rund. Es gebt se awwer. So leit zum Beispiel uf der Ostseeinsel Rügen e klooni Stadt mi ‘m Nome Putbus. Die hot e „Circus“. Gemoont is e runder Platz, umgewwe vun „16 blendendweißen Kavaliershäusern mit Rosenstöcken davor“, wie merr i ‘me Reiseführer lese kann. Fürst Wilhelm Malte I. (1783 – 1854) hot de Auftrag forr de Bau vun der wirklich beeindruckend „klassizistische Anlage“ gewwe. 1808 hot de Architekt Johann Gottfried Steinmeyer (1780 – 1851) ongfang mit seiner Arwet un noh 40 Johr war er fertich. Awwer net norr mi ‘m Circus, sondern aah mi ‘me herrliche Schloss, dem wu die owwre DDR-Zehntausend 1962 de Garaus gemach hun, un oom 75 ha große Schlosspark.

Charlottenburg im Banat

FotoQuelle: Lapasturistic

In der gleich Zeit is aah im Banat e rundi Wohnanlage entstann, awwer ka Stadtzentrum odder Taal vun ‘re Residenzstatt odder vu ‘me Badeort, sondern e Dorf. Ja, e rundes Dorf, un des gebt ‘s heit noch im Banat: Charlottenburg. In dem vun der Landsmannschaft vun de Bander Schwowe 2011 rausgebrungne Buch Städte un Dörfer kann merr lese, dass „die Ansiedlung sich unter Baron Samuel Neumann Edler von Buchholt vollzog“. Des is in de Johre 1770 / 1771 passeert. De Carl Samuel Neumann Edler von Buchholt (1722 – 1782) is 1764 zum Baron geadelt wor un hot sich stärk forr die Kolonisation vum Banat ingsetzt. Bei WIKIPEDIA kann merr vun 24 Ortschafte lese. Charlottenburg war aah dabei. 1780 hot de Gelehrte un Geschichtsschreiwer Francesco Griselini (1717 – 1787) in seim Buch Versuch einer politischen und natürlichen Geschichte des temeswarer Banats in Briefen an Standespersonen und Gelehrte aah iwer Charlottenburg gschrieb, un des gar net schlecht: „Die Anlage Charlottenburg , welche ein Kreis um eine im Mittelpunkt befindliche Maulbeerpflanzung macht, will mir besonders gefallen.“

Gfalle tot des Dorf bestimmt aah em Bernads Kathi (*1959) aus Johrmark. Mei Johrmarker Landsleit wisse jo, vun wemm ich do schreib. Es Kathi angascheert sich in Deitschland un in Rumänien als Journalistin, Germanistin, Autorin, Iwersetzerin, politischi Aktivistin, Jurymitglied, Rausgewwerin un jetz aah noch als Kuratorin . . . und des grad in Charlottenburg, im runde Dorf im Banat, gelee zwischen Fiwisch, Blummethal, Altringen, Buzad, Lichtenwald un Keenichshof.

Die Deitsch Sendung vun Radio Timișoara / Temeswar hot am 18. Juni e langes Interwiu mi ‘m Bernads Kathi ausgstrahlt. Unser Johrmarker Landsmännin – odder saat merr vleicht Landsfraa? - hot nämlich in Charlottenburg e Museum ufgemach, net loonich, awwer schun als wichtichi Mitiniziatorin, kennt merr soon. Des Museum haaßt Schwabenland. Do kann merr sich vorstelle, was in dem un um des Haus so alles drinn leit, hängt un steht. Nateerlich hun mer Banader Schwowe schun einiche vun de Heimatstuwwe im Banat un aah in Deitschland – in Ulm sogar e zentrales Donauschwowe-Museum. Awwer do dafun kann merr jo net genuch hun, hot ‘s Kathi sich gedenkt un an die Arwet gemach, aah wann die Landsmannschaft nicks dazu beitroon hot wolle. (Originalton Bernads Kathi: „Von da kam kein Echo.“)

Es handelt sich um ‘s Haus Nr. 12. Un die frischgeback Kuratorin is net mied wor, 20 Minute lang zu verzähle, wie des Dorfmuseum entstann is un was letztendlich draus wor is. Sorin Prada haaßt de jetzich Eigentümer un eigentlich Hauptkurator. Er hot sich sehr vill Mieh gewwe un vill vun de ausgstellte Sache gsammelt un sogar kaaft. Frieher, wie die Deitsche noch in dem Dorf gelebt hun, hot des Haus der Rosalia un em Ernest Schmidt gheert. Ich will des Interwiu jetz net Wort forr Wort ufschreiwe, awwer eich, liewe Landsleit, e paar Stichwärter gewwe, die wu ‘s Bernads Kathi benutzt hot: ursprünglich, Keller, Backstube, Küche, „Paradizimmer, wie die Schwowe sagten“, Weinfässer, alte Waschmaschine, Dreschmaschine, Schubkarren, „Hambar“ (verwandelt in eine Bar), Kutsche aus 1880, „Fayanzen“ von früher, „Kredenz“ mit den „Sodaflaschen“, die Tracht „von meiner Oma mit dem Leibl“, die „gstrickte Patsche“, Butterfass, Jägerbild von meinem Opa und noch vill, vill meh.

Vergesse sellt merr vleicht net, dass des anscheinend sehr lewendich Dorfmuseum aah vill Sticker (zum Beispiel Wandteppiche) vun anre Nationalitäte, die wu heit im Dorf un in der Gegend lewe, vorzuweise hot: Rumänre, Ungare un Serwe. Asso e multiethnisches Dorfmuseum. Mit dem is awwer gar net genuch. Im Nochberschhaus gebt ‘s sogar e Jägermuseum. Asso forr so e kloones, rundes Dorf is des schun ganz scheen vill Kultur.

Berns Toni