Ja, ja, die Egerländer.
Ich kann mich noch erinnre, an die 1960er Johre in Johrmark. Die eerschte
Pladdespiller sin im Dorf ufgetaucht un mit ehne aah die eerschte
Langspielpladde vum Ernst Mosch un
de Egerländer
Musikante. Notte vun ehre Sticker hun de Wech iwer de Eiserne Vorhang
funn odder sin vun de Kapellemaastre noh’m Gheer ufgschrieb wor. Des war so
ähnlich wie’s Diktatschreiwe in der Schul. Des oone hun ich ghasst wie de Teiwl
un des annre hun ich sowieso nie känne,
weil ich ka Talent derzu ghat hat. In der Musik is es nun mol so: Ohne Talent
hänge die Geije ganz hoch, do kummst net hin, aah wannst dich noch so streckst.
In Johrmark ware awwer
einiche, die hun sich net ummesunst gstreckt. Zum Beispiel em Safer sei Buwe, de Hans un de Helmut. Die
hun schun drunne studeert odder ongfang zu studeere un hun noo in Deitschland weider
Musik gemach. Gut, ich moon, des hun annre aah, sogar ich, bis mei Onsatz nemmi
mitgemach hot, awwer halt net uf dem Niveau un schun längst net in der Kapell
wie die Safersch-Buwe.
Jetz gebt’s uf YouTube e
Video, uf dem wu die zwaa Brieder aus Johrmark verzähle, wie se zum Ernst Mosch kumm sin un wieso se heit
noch dort unner dem neie Kapellemaaster, em Ernst Hutter, Musik mache. Un des sogar in zwaajerlei Hinsicht: Sie
spille dort uf ehre Instrumente un komponeere aah selwer Sticker, die wu vun de
Egerländer
in Konzerte gspillt un uf CDs, des sin die Langspillpladde vun frieher, ufgholl werre.
Gut, ich sin jo vorbelasst
mit dee Egerländer. Bekloppt, nennt mei bessri Hälft des. Awwer gut,
was gerecht is, is gerecht. Soll ich mer jetz e totali Bluttransfusion mache
losse, dass der Virus aus meine Odre verschwind? Des wär doch ungerecht, wu des
Egerländer-Herzblut
mer bis jetz iwerhaupt net gschad hot, sondern im Gegenteil mich jung wie in
meine Johrmarker Johre ghall hot. Un die Johre aus meiner Jugend ware jetz, wu
ich mer des Video ongschaut hun (mindestens schun fufzich Mol) schun wedder do,
in meim Geist un in meine Odre. Do kann mei Aldi soon, was se will. Jetz hun
ich mer’s aah grad wedder ongschaut, weil die zwaa Musikante hun aah uf dem
Video net vergess, wu se herkumme. Un do hun ich mich doch direkt ongsproch
gfielt: mei Dorf, mei Kapell, mei Kumrade … un mei Fraa. Do kann’s soon, was es
will. Des war aah sei Zeit un sei Umfeld, grad so wie meini. Un schau her, es
hot mitghorcht, mei bessri Hälft, un nicks gsaat. Ich moon, es hot doch net
norr gedenkt, sondern aah e bissje was gspeert. Un des is gut so.
Menschenskinn, Hans & Helmut, Musik mache
is doch was Scheenes, awwer driwer redde, hot noch mol e ganz annri Qualität.
Dankscheen, aah vun meiner Fraa.
Berns
Toni
Keine Kommentare:
Kommentar veröffentlichen