Mensch, Scharka!

De Carl Gibson hot meh Berufe, wie in meiner ganzer Ahnengalerie vorkumme. Dort hot's norr e Zimmermann, e Fassbinder un, de Rest bis zu der Einwanderergeneration ins Banat, Baure gewwe. Gut, e Musikant war aah dabei, awwer des war jo selmols schun e Hobby, wann's aah noch net so ghaaß hot, un ka Beruf - sogar in Johrmark.

Nateerlich hun ich do e riesen Respekt vor'me Mann, der wu Autor, Publizist, Philosoph, Literatur- un Zeitkritiker gelernt hot. Do kann ich als oonfacher Bandarweter norr voller Verwunnerung zu dem Mann ufschaue. Hoffentlich gehts em net mol so wie der Elena. Die war mol mit ehrem Mann, em Nicolae, in Wien uf Bsuch un is oweds loonich ausgang. Dabei hot se sich verlaaf un weil se ka Lust ghat hat, eehre Hotel zu suche, hot se sich gedenkt, sie geht halt ins eerscht beste nin un iwernacht dort. Ich moon aah, ooni Nacht ohne de Nicolae geht jo grad noch. Sie is no nin gang hot iwer de Porteer gsaat, sie will e Zimmer forr die Prof. Dr. Dipl.-Ing. Akademiemitglied Elena Ceauşescu. Naa, des geht beim beste Wille net, hot de Porteer gsaat, er hot norr meh oon Zimmer frei. Die Elena kann dort iwernachte, awwer die annre misse drauß bleiwe.

Ich kenn jo de Carl Gibson vun Sacklas net, un waaß norr, dass sogar es Müller Herta un de Wagner Richard neidisch sin iwer sei ville Berufe. Sunst meechte se jo net immer so iwer ne schenne. Na sie hätte doch aah etwas Gscheides lerne selle, no wäre se des aah wor.

Um so stolzer sin ich, wann ich in're strict secreter Akte vum Ministerul de Interne, Inspectoratul Judeţean Timiş, serviciul 1/B, die wu de Carl Gibson uf seim Blog veröffentlicht hot, wie des jetz Mode is, lese kann, dass e gewisser "turist vest-german Scheuer Mihai, care se afla în vizită în R.S.R.", a Brief vum Carl Gibson mit uf Deitschland gholl hot, um ne dort bei Europa Liberă abzugewwe. In dem Brief steht drin, dass er, de Carl Gibson, der unabhängig Gewerkschaft SLOMR beigetret is, um so uf Deitschland fahre zu kenne - "să adere la acesta în scopul obţinerii aprobării de plecare definitivă în R.F.G.".

Ich waaß nateerlich net, ob de Scheuer Mihai, dee Brief abgewwe hot. Awwer ich bild mer jetz oonfach mol in, der Mann wär e Johrmarker, kennt jo sein vum Nome her, un no wär asso e Landsmann vun mehr mitverantwortlich, dass es Ceauşescu-Regim vun innewenzich langsam, awwer sicher verfault is.

Was mer awwer net so gut gfallt, is, dass de Carl Gibson anscheinend die Gewerkschaftsidee missbraucht hot, um abzuhaue, un se net umgsetzt hot, um Verbesserunge forr's werktätiche Volk zu erreiche. (Als ingfleischter IG Metaller muss ich des mol losswerre.) Des gilt nateerlich norr forr dee Fall, dass selmols de locotonent colonel Istrate Gheorghe ka Märchen in sei strict secreti Akte gschrieb hot. Weil aah des is jetz in Mode, dass manche Leit behaupte, die mit de Schreibmaschine gschriebne Akten vun de Securitateoffizeere wäre oft Eigeninterpretatione un net des, was die Opfer odder Täter in dem Saustall so alles gsaat hun.

Berns Toni