Mensch, K!

Mer schenne immer iwer die Securitatespitzle. Zu Recht! Weil so etwas macht merr net, annre Leit verpetze. Awwer wann merrs genau hollt, ware mer doch all Securitatespitzle. Ich meecht mol soon, Securitatespitzle aus zwatter Hand. Weil die Spitzle aus eerschter Hand, die ware doch unner uns: im Dorf, uf der Arwet, in der Schul, uf der Hochschul un im schlimmste Fall sogar in der Verwandtschaft odder der eigne Familie. Jo, jo, des hot’s alles gewwe. So is es nun mol i’me totalitäre Staat mit Gestapo, Stasi, Securitate, KGB odder wie se selmols all ghaaß hun.

Do wär ich gar net drufkumm. Awwer do unlängst hun ich so e Schriftstick funn, des wu de Vermerk „strict secret“ ufgedruckt hot. Es is eigentlich e Brief, dee wu die Securitate vun Yassy uf Temeswar gschickt hot. In dem Schreiwes steht drin, dass „sursa noastră Filip“, asso unser Quelle Filip, in Temeswar war un sich dort mit de Schriftsteller Eduard Schneider, Richard Wagner un William Totok getroff hot. Un de gut Filip hot halt seim Führungsoffizeer, wie die Profisecuriste ghaaß hun, scheen brav verzählt, was die drei Autore ehm so alles in gutem Glaawe verzählt hun. Asso gut, normales Spitzelgeplapper. Des alles hätt mich noch net uf die Idee gebrung, dass mer jo all Spitzle ware. Gut, Güteklasse zwei, meecht merr do vleicht uf herrisch soon, awwer immerhin Spitzle.

Des is mer eerscht kumm, wie ich de letzte Absatz vun dem Brief geles hun. Do steht’s nämlich so: „Tot în legătură cu posibilităţile de trecere a frontierei, K. din com. Giarmata, studentă anul II germană – engleză la Univ. ‚Al. I. Cuza Iaşi a afirmat: ‚Din comuna Giarmata pleacă foarte mulţi locuitori în R.F.G., nu numai cei de naţionalitate germană ci şi români. În schimbul unei sume de bani (cca.40.000 lei) s-ar putea obţine paşaport pentru plecare definitivă din ţară. Locuitorii din comună cunosc persoane de la Serviciul de Paşapoarte din Timişoara sau chiar din Bucureşti, care, în schimbul unei sume de bani, le aranjează plecarea din ţară.‛“

Asso ich waaß nateerlich net, wer die Person aus Johrmark is. Ehre Nome is in dem Brief dorchgstrich. Awwer net gut genuch, so dass merr de eerschte Bustawe lese kann. Des is e K. Un wann ich mer noh onschau, wie die annre net dorchgstrichne Nome gschrieb sin, no kännt ich mer vorstelle, dass des e Vornome is. Vleicht Katharina. Des kännt zu ooner Deitsch-Studentin passe. Awwer des is jetz alles nor hypothetisch un aah net so wichtich.

Vill intressanter is, dass merr do sieht, wie die Spitzle, in unsrem Fall de Filip, alles was se so in ehrer Umgebung gheert hun, der Securitate weiderverzählt hun. (Aah wanns noch so banal war un etwas, wu e jeder Spatz uf’m Boom gephiff hot – wie in dem Fall do.) Merr därf jo heit in Deitschland nemmi soon, der un der war e Spitzel. Asso werr ich mich hiede, do zu schreiwe, dass e gewissi Person de Filip war. Awwer ich kann soon, dass anre Leit behaupte, de Filip war zu dere Zeit, wie der Brief vun Yassy uf Temeswar gschrieb is wor, im Summer 1981, Hochschullehrer in der Hauptstadt vun der Moldau. Irgendwie passt des schun alles zamm, weil mei Wenichkeit is net mit Schriftsteller un Studente zammkumm, norr mit Schichtarweter in der Fawrik. Was net haaße soll, dass unner dee net aah Leit ware, die wu alles, was ich odder annre verzählt hun – die Täch sin jo lang, – der Securitate getraa hun. Uf jede Fall kann merr soon, mer hun jetz aah e aktenkundiche Johrmarker Spitzel, odder e Spitzelin, vun der „categoria a 2-a”, asso so wie du un ich wahrscheinlich aah.

Un das des System besonders uf de Hochschule gut funktioneert hot, kann merr i’nre Artikelserie vum Ernest Wichner in der BANATER ZEITUNG / Temeswar (Fewer 2012) nohlese. Do haaßt’s nämlich vun ooner Temeswarer Hochschullehrerin, die wu aah forr die Securitate gearwet hot: „Diese Hochschullehrerin war eine sogenannte Residentin: Sie stand im Dienst der Securitate und verfügte über ein Netz von Zuträgern – in der hauptsache Studentinnen und Studenten ihrer Fakultät – um an ihre Informationen zu gelangen. Für die Securitate hatte dies einen großen Vorteil, denn die Zuträger wurden ihr bekannt, ohne dass das Amt selbst mit ihnen in Kontakt treten musste. Die eifrigsten von ihnen, der oder jene, die erpressbar waren, labile oder karrierebewusste Studenten, konnten anschließend bei Bedarf als Ims rekrutiert werden.”

Jawoll, so un net annerscht is wahrscheinlich aah unser Johrmarker K. Zuträger vun der Securitate wor - so wie vill vun uns aah, ohne dass mer’s gewisst hun.

Berns Toni