Mensch, Siegfried!

De Herr Albert Schwab, des is e Hiesicher mit’re Fraa aus Johrmark, hot mer e Mail gschickt mit’re Sendung vum SWR2, e südwestdeitscher Kulturradiosender. Ausgstrahlt wor is die Sendung am Samstach, em 10. März 2018, vun 10 Uhr 30 bis 12 Uhr. Un de Titel vun der Sendung hot mich sofort noch neigeericher gemach, wie ich sowieso schun sin: Treffpunkt Klassik extra – Gast im Studio: Siegfried Jung, Tubist.

Ich hun mer die Sendung onkorcht un sin immer stolzer wor – obwohl des doch gar net mei Verdienst is, e Johrmarker zu sein. Die Sendung war e Mischung aus Interview, meh e lockres Gspräch, un vill sehr, sehr guder Musik. Ich hun mich dabei gfroot, wer vun de Johrmarker Musikante hot’s wohl in seiner Karriere am weitste gebrung. Is es de Metzje Matz, die Safer-Buwe, de Retter Sepp, de Schütt Martin un’s Eva, de Bild Matz, de Turmanns Nicki, de Specks Ossy, sei Nochber vun drunne iwer die Gass, de Potche Siegfried, de Rosner Walter un vill annre… odder de Jung Siegfried. Der is zwar de Jingst vun dee all, hot’s awwer als Oonzicher bis in de Orchestergrawe vum Richard-Wagner-Festspielhaus in Bayreuth gschafft. Des is forr jede Musiker so e Art „Ritterschlag“, weil dorthin kann merr sich net bewerbe, merr werd beruf. Un desjohr werd er, de Jung Siegfried jun. – so kännt merr aah son, weil sei Vatter haaßt aah Siegfried un war Musikant in Johrmark; dort hatt die Spezifizeerung „sen.“ un „jun.“ schun Tradition ghat -, bei de Richard-Wagner-Festspiele in Bayreuth mitspille. Gut, ich war vor Johre aah schun mol in dem Orchestergrawe – vleicht sogar als eerschter Johrmarker iwerhaupt. Awwer die hun mich net mitblose geloss, norr schaue un staune hun ich därfe.

Siegfried Jung

Bildquelle: SWR2

So e Sendung kann schun sehr aufschlussreich sein. Merr erfahrt sogar etwas iwer des oon odder anner inwenzich Organ vu’me Mensch, der wu uf so’me große Instrument wie de Bass Musik macht. De Siegfried hot em Moderator Burkhard Egdorf verzählt, dass er e Lungevolumen vun 7 Liter hot, medizinisch geprieft. Asso, wann merr sich die Konzerte vum Jung Siegfried uf YouTube onschaut (do gebt’s einiche), noo werd merr sich net wunnre, dass der vill Luft brauch, um so uf seim Bass – herrisch haaßt des Basstuba – blose zu känne. 

Die Sendung war so konzipeert, dass aah Platz forr Musiksticker war, in dee wu de Jung Siegfried un sei Fraa, es Johanna, des wu Harfe spillt, zu heere sin. Es ware meistens Sticker vun der CD Paesaggio, iwer die ich jo in meim Blog schun was gschrieb hun, awwer aah annre Sticker, uf die de Siegfried große Wert leet. Forr was des so is, hot er in der Sendung erklärt. Un er hot aah iwer sei Musiker-Musikante-Verständnis geredd. Des war ganz intressant. Die zwaa, de Moderator un sei Gast, sin irgendwann aah uf die Volksmusik zu redde kum. De Moderator hot gemoont: „Die Siebenbürger Sachsen und Banater Schwaben sind ja auch bekannt für ihre Volksmusik.“ Druf hot unser Johrmarker Landsmann geantwort: „Ich komme nicht unbedingt aus einer Musiker-Familie, aber eben aus einer Musikantenfamilie.“ Un er macht schun ganz bewusst e Unnerschid zwischen Musikante und Musiker, hot er gsaat. E guder Musiker muss noh seiner Meinung net unbedingt aah e guder Musikant sein. Umgekehrt werd awwer e Schuck drauß: Aus’me gude Musikant werd leichter e guder Musiker. 

De Burkhard Egdorf hot de Siegfried aah noh seine „familiäre Beziehungen“ zu Rumänien un besonders ins Banat gfroot. Do is die Antwort: „Meine Eltern sind jetzt fürs Alter zurückgegangen in die alte Heimat. Und ich bin auch sehr gerne da unten, hab auch mittlerweile die rumänische Sprache erlernt, nicht besonders gut, aber so, dass ich mich verständigen kann. Da ich in Deutschland aufgewachsen bin und zu Hause kein Rumänisch gesprochen wurde, hab ich angefangen durch Tätigkeiten als Solist in Rumänien dann auch Rumänisch zu sprechen. Und das macht auch viel Spaß.“ Un de Moderator hatt noch net genuch ghat. Er hot wisse wolle, ob de Siegfried dort unne privat „mehr in den ländlichen Regionen“ is „oder in der Stadt“. Un der hot geantwort: „Privat sind wir natürlich mehr in der ländlichen Region, genau gesagt, da wo wir herkommen, wo meine Familie herkommt vom Dorf. Ja, das Dorf liegt etwas abseits von der Banater Hauptstadt Temeschwar. Das Interessante ist für mich tatsächlich die Stille und die Ruhe dort.“ Des glaab ich ehm gere, weil uf die Puszta zwischen Johrmark un Bentschek is die Hecktik vun der Banader Metropole noch net vorgedrung. Wer troomt eigentlich net geere vun so’me Lewe. Awwer losse mer des, ich moon, ich hun schun wu annerscht mol gschrieb, was mei bessri Hälft vun so’re Traumverwirklichung in der alt Heimat halt. Awwer es Troome kann’s mer jo net verbiede. Un des is gut so.

Beim zwattvunletzte Musikstick aus der Sendung sin ich noo net ins Troome verfall, awwer ins Schwärme. Un wie noch! De Siegfried hatt nämlich e Langspielplatt dabei ghat, die wu er in Rumänien i’me Musikgschäft kaaft hot, ob in Bukarest odder in Temeswar odder in ooner annre Stadt hot er net gsaat. Uf jede Fall is des, was uf der LP (junge Leit wisse heit vleicht gar net, was des is) druf is, e Sensation: die Rhapsodie Nr. 1 vum George Enescu, gspillt vum Sinfonieorchester George Enescu, dirigeert vum Maistro George Enescu (1881 – 1955) heechst perseenlich. Besser geht’s eigentlich net.

Ich kann norr soon: Leit, horcht eich die Sendung on, so lang wie de SWR2 se noch in seim Tonarchiv öffentlich onbiet. Des Gspräch un die Musik känne e Gewinn forr alle Musikliebhaber sein, awwer forr uns Johrmarker nateerlich e doppelter. De Siegfried hot aah uf sei Homepage e Link zu der Sendung gstellt. Dort gebt’s owwedruf noch e Link zu’re Sendung mi’m Siegfried uf RADIO TEMESWAR.

Zum Schluss kann ich norr soon: Mensch, Siegfried! Des host gut gemach. Awwer du host em Burkhard Egdorf net gsaat wie des Dorf „abseits von der Banater Hauptstadt Temeschwar“ haaßt un das des e Musikantedorf war, vleicht es oonzich uf der Welt. Macht nicks, vleicht gebt sich jo wedder e Gelegenheit. Bis dann hall ich des do schun mol fest: Es handelt sich um Johrmark.

Berns Toni