Mensch, Ossi!

Ich hat mer forr dee Text do e Arwetstitel zurechtgeleet, und des war Zwaa Musiker aus'm Banat im Gespräch. Awwer noo hun ich’s doch net iwers Herz gebrung, de Titel zu ännre, weil er halt besser zu meim Vorhaben passt: Ich will iwer de Specks Ossi schreiwe, weil ich zufällich uf e YouTube-Interview gstoß sin, des wu mer wirklich ans Herz gang is. De Horst Keller is e Banader Schwob aus Glogowatz, der wu jetz in Rastatt lebt un vun dort aus e ziemlich erfolgreiche YouTube-Kanal zum Gittare spille lerne betreibt. Der Mann nennt sei Internet-Auftritt Horst Keller VIP-Guitar. Desjohr im Fewer is’m ingfall, sei Aktivität uf YouTube auszuweide. Er hot sich nämlich vorgholl, Interviews mit verschiedene Leit, ich gehn jetz mol davun aus, dass die meistens aus der Musikwelt kumme werre, zu feehre. Un sei eerscht (un bisher aah letzt) Interviewpartner war de Specks Ossi aus Johrmark.

Asso absolut souverän war de Ossi in dem Gspräch, des muss ich schun mol vorrewech holle. Dass es in der Stunn un 19 Minutte, so lang hun die zwaa geredd, un merr hat de Eindruck ghat, sie hädde noch lang so weidermache känne, meistens um die Musik gang is, kann merr sich leicht vorstelle. De Specks Ossi hot verzählt, wie des selmols war, wie er in die Musik regelrecht ningebor is wor in dem „kleinen Örtchen Jahrmarkt. […] Da gab’s mehr Blasmusik, als Brot zu essen. […] Es gab zwei riesen Blasorchester, die beide damals im Banat führend waren für ihre Qualität. […] Mir wurde die Musik in die Wiege gelegt.“ Des mit der Wieh is wirklich e herrlichi Anekdote. Awwer die verzähl ich do net noh. Die horcht Dehr eich besser selwer on, weil des Video kann merr jo noch uf YouTube siehn.

Es war sogar forr mich, der wu mi’m Specks Ossi so manchi Kerweihnaacht uf de Haader-Kulturheimbiehnes verbrung hot, e Iwerraschung, was der in seim Musikerlewe so alles erlebt hot. Mensch, Ossi, ich hun zum Beispiel net gewisst, dass du net norr e leidenschaflicher Blechmusikant warscht un noch bist – annerscht kännst du jo net schun seit Johre bei de Egerländer Musikante die Tuba blose -, sondern dass du schun in Rumänien e, ja, merr kanns annerscht net nenne, sehr origineller Rockmusiker warscht. „Ich glaub, ich war der einzige Tubist in Rumänien, der in der Rockband mit der Tuba gespielt hat“, verzählt de Ossi. Un wie de Dixie Krauser ne iwerzeujt hot, i’me Rockkonzert, Open Air vor 3000 Zuschauer, mit der selmols (1980er Johre) in Rumänien berühmt Band Pro Musica ufzutrede, des sellt merr sich in dem Interview net entgehn losse.

Merr erfahrt in dem Interview wirklich sehr, sehr vill iwer die Musik als Kunst – „Die Musik ist die größte Form der Kunst, weil sie wirklich Körper, Geist und Seele in Einklang bringt.“ (Originalton Ossi) -, als gesellschaftliche Leim, der wu alles zammhalle kann, als absoluter Glicksausleser, awwer aah als ganz perseenliches Ufputschmittel, als Stressfaktor un leider aah als Belastung forr die Familie.

Horst Keller (li.) un Oswald Windrich
im Interview uf YouTube
 1. Fewer 2018

Un sellt’s jetz noch e Johrmarker gewwe, der vleicht net waaß, wer de Specks Ossi is, dem will ich’s do verrode: Des is de Oswald Windrich, Musiker wie er leibt un lebt, grundehrlich  un bekannt wie e schecklicher Hund. Un do is des Interview: https://www.youtube.com/watch?v=xUXpSvGODeo.

Berns Toni