Blechmusik-Startup

Ohne Fortschritt geht nicks, net in der Wertschaft un net in der Kultur. Un Fortschritt gebt‘s norr dort, wu Mensche sich etwas Neies infalle losse. Dass so etwas äfter dort passeert, wu e Krise die Wertschaft, Kultur un‘s ganze soziale Lewe ins Stolpre bringt, is e aldi Weisheit. Neie Einfälle genereere manchesmol echte Modetrends. So e Trend kann merr seit paar Johr in fast alle Lewesbereiche feststelle. Startup haaßt des Wunnnerwort geger die Krise. Aah heit in der Pandemiekrise. So e Startup is nicks annres wie die Umsetzung vun ooner neier Gschäftsidee in die Praxis: asso Ausdenke, Ausproweere un, wann merr Glick hot, mit Schwung starte.

Forrwas soll so etwas net aah in der Blechmusik gehn, hot sich de Ernst Hutter, de Chef vun de Egerländer Musikante, gedenkt. Er hot sei Fraa un sei drei große Buwe gfroot, was sie devun halle, un die hun gsaat, Proweere geht iwer Studeere. Es Resultat war e Startup, e Blechmusik-Startup. HUTTERMUSIC haaßt die Firma. Un was die mache? Na was schun? Musik, Musik, Musik. Un sie kimmre sich drum, dass die Egerländer Musikante un ehre Musik net vun Corona ufgfress werre. Anscheinend mit Erfolg, weil ich hun die Egerländer in ehrem Festival-Konzert im Circus Krone wohlgenährt un gut gelaunt un vor allem mit wallendem Egerländerblut in de Odre gsiehn. (Merr muss Vollblutmusikante norr blose losse, no kann‘s greeßte Minirindsviech dee nicks onton, nemmol wann‘s aus China stammt.) Na, wie haaßt des jetz norr neideitsch? … Sapperlot! Jetz: Livestream nennt merr so e Konzert, wu‘s Publikum dehoom bleiwe muss un die Musikante im‘e leere Saal odder Circus, wie in dem Fall do, spille därfe.

Mei bessri Hälft un ich hadde uns aah Gäst, Konzertgäst, ingelad. Mei Schwor hot noch frische Langosch geback un ich war frisches Bier holle, weil bei meim Dorscht laafts Bier im Keller aah schun mol ab. Noo is es lossgang. Mer ware im Circus Krone in München. Datum: 21. Mai 2021, Uhrzeit: 19:30 Uhr. Leit, was soll ich eich soon? Es war wie in Johrmark uf‘m Musikantebaal. (Asso fast so, weil Johrmarker Musikantebäler bleiwe forr alli Ewigkeit uniwertrefflich.)

Zwaa Taale hot des Konzert ghat. Im eerschte Taal hun die Egerländer – Die kleine Bestzung gspillt - zum Glick war ehre Musik net so umständlich wie ehre Nome - un noo der Pause sin Ernst Hutter & Die Egerländer Musikanten uf die Biehne kumm – Pardon! in die Manege.

Iwer die Musik will ich desmolrum gar net vill Wärter vleere. Des is bei de Egerländer aah oft e miesichi Arwet. Bevor ich mei ganzes Arsenal an Superlative in meim nemmi ganz junge Hern zammgekratzt hun, schreib ich liewer vun dem, was ich gsiehn hun. So e Livekonzert – aah wanns norr dorch die Glasfasern kummt – is jo doch aah etwas for‘s Aue.

Im eerschte Taal hun ich awwer ka bekannte Gsichter gsiehn. Deer wisst schun, was ich moon: Johrmarker Gsichter. Des war meiner Fraa wurscht: Sie war vun dee „stramme Kerle“ - so hot se wirklich gsaat – faszineert. Ob se iwerhaupt aah noch hinghorcht hot, was die ins Zirkusrund so an Teen un Rhythmus gezauwert hun, waaß ich net. Ich awwer hun doch meh ghorcht wie gschaut. Un unner dem, was ich so alles gheert hun, war aah die Spitzbuben-Polka vum Turmanns Nicki aus‘m Lothringe dabei - e echte Schnellpolka forr flinke Zunge un Fingre. Wie noo die junge Bläser de Egerländer Express vum Peter Laib gspillt hun, war mer klor, dass do e neii Bläsergeneration (mit Knopfakkordeon & Schlagzeug) am Werk is. 

Pause. Zwatter Taal. In Johrmark war des immer de Schlagertaal. Drum will ich do gar ka Vergleiche ziehe un aah glei bei de Gsichter bleiwe. De Safersch Helmut aus der Hinnereih hot Fliglhorn gspillt un de Turmanns Nicki hot mit seiner kongenial – nateerlich rein musikalisch gedenkt – Partnerin Katharina Praher gsung. Die tiefste Instrumente hun glei zwaa Johrmarker geblos: de Jung Sig jun., aah aus der Hinnereih, un de Specks Ossi aus der Neigass. Mi‘m Glogowatzer Hollich Toni (Klanett) un em Tröster Franz (Fliglhorn) – ich moon der kummt aus der Mehala – ware sechs Banader Schwowe in der Manege. Wivl Prozent des vun de Egerländer ausmacht, waaß ich net, weil ich hun vor lauder Horche vergess zu zähle.

Holger Müller

Screenshot: Berns Toni

Ich will awwer net unerwähnt losse, dass aah die große Egerländer Sticker vun Johrmarker Komponiste gspillt hun: Genieß dein Leben jeden Tag vum Safersch Helmut un Heut spielen die Egerländer vum Turmanns Nicki. Wie alles Scheene uf der Welt is awwer aah des Konzert rumgang un ich hat schun de Eindruck ghat, dass all froh ware, ohne greeßre technische Probleme aus dem Egerländer-Abenteuer rauskumm zu sein. Weil oons is kloor: Die Livestreamtechnik hot noch e lange Wech vor sich, um mit normale Fernsehsendunge gleichzuziehe. Des Konzert im Circus Krone war awwer fast perfekt. Do därfe sich aah de Moderator Edi Graf (in Johrmark war des de Ansager) un de Holger Müller mit seine zwaa Stecke un Kochleffle gfreue – un nateerlich alle Techniker un Toningineere.

Berns Toni