De Hajo Schumacher is 57 Johr
alt, lebt in Berlin und schreibt so Bicher wie Solange du deine
Füße auf meinen Tisch legst odder
Kein Netz. Er is aah
Journalist un schreibt Kolumne forr verschiedene Zeidunge un
Zeitschrifte. Do unlängst is mer in der ZUKUNFT JETZT – e
Zeitschrift forr die Rentner, ich kännt aah soon forr die alte Leit,
awwer des wolle jo vill net heere – e Familien-Kolumne vum
Schumacher
in die Aue gfall, die haaßt Fast vertraut.
Er
schreibt dort, dass frieher „das Vertrauen zwischen Eltern und
Kindern grenzenlos“ war, un wie
er als Halbstärker mit
der Situation umgang is, um net zu soon, wie er die Situation
ausgenutzt hot, un naachts aus ehrem „hellhörigen Reihenhaus“
gschlich is. Um awwer sich
selwer unner der Bettdeck vorzuteische, hot er mit „Sportsachen und
Bettdecke eine Skulptur“ zammgewickelt, „die bei flüchtigem
Blick einen schlafenden Schüler vermuten ließ.“ In der Gschicht
vum Hajo Schumacher
is des Abenteuer so ausgang: „Die Flucht gelang. Um Mitternacht
stand ich vor einem Tanzlokal, wo einige Kumpels warteten. Leider
forderte der Türsteher meinen Personalausweis. Mist. Flucht
geglückt, Experiment gescheitert.“Ja,
wie die Zeit vergeht. Aus unsrem Berliner Naachtschwärmer is aah e
verheirater Mann mit Kinn wor. Un no kanns am schun mol als Vatter so
gehn, wie in der Kolumne beschrieb. Sei
Reizblos hot ne naachts geweckt, un noo hot er sich gedenkt, wannst
schun uff bist, schaust glei
aah ins Jugendzimmer. Dort hot de Schumacher-Junior drin gschlof.
Forr ‘s Resultat vun dem Kontrollgang brauch de Schumacher-Senior
norr drei korze Sätz: „Ich tastete zart das Bett ab. Ach nee. Aus
Sportsachen war eine Skulptur geformt.“
Bei
mer hot do etwas geklickt. Hot ‘s net in Johrmark aah schun mol so
ähnliche Gschichte gewwe. Verzählt is es uf jede Fall wor. So in de
1970er Johre soll des geween sein. Awwer ka Buwe sin
selmols naachts aus ‘m Fenster kupst, sondern Mäd. Die hun zu ehre
Habers wolle. Stolz
sin ich do schun,
dass es in Johrmark Mäd gewwe hot, vleicht aah junge Weiwer, die wu
in der Tradition vun so beriehmte Literaturfigure wie der Lady
Chatterley gstann hun. Wie ‘s unser Johrmarker Weibsleit noh ehrem
Naachtausflug gang is, waaß ich net, awwer dass es der Connie
Chatterlay selle naachts in Wragby Hall sehr gut gang is, kann merr
heit noch im Roman vum D.
H. Lawrense (1885 –
1930) nohlese. Uff jede Fall ware
die englisch Lady aus ‘m Roman un die Johrmarker Mäd aus der
Wirklichkeit emanzipeerte Weiwergestalte.
Berns Toni
Keine Kommentare:
Kommentar veröffentlichen