Die Sparkass in Johrmark

Wie mer Altjohrmarker, odder merr kännt aah soon Exschwowe, ausgewannert sin, hot ‘s in Johrmark ka Sparkass gewwe. Norr de CEC. Dort hun mer unser Lei in ‘s CEC-Bichlche introon geloss. Des war in der vorkommunistisch Zeit etwas annerscht, do hot ‘s in Johrmark sogar meh Bänk gewwe. Ooni war zum Beispiel die Erste Jahrmarkter Sparkassa Aktiengesellschaft. Un die hot am 12. Jäner 1926 ehre „geehrten Aktionäre höflichst“ zu ooner Generalversammlung ingelad.

Die Vorstandschaft hatt forr die XXII. Ordent. Generalversammlung, die wu „am 31. Jänner 1926, vormittags 11 Uhr, in den Institutslokalitäten stattfindet“ sowohl e Bilanzkonto wie aah e Gewinn- un Verlustkonto vorbereit ghat. Im Bilanzkonto sin die Aktiva un die Passiva mit der gleich Zahl ausgewies: 3.519.122,07 Lei. In der Gewinn- un Verlusttabell sin aah de Soll- un Habenstand gleich: 534.848,54 Lei. Des war de Kassastand vum 31. Dezember 1925.

Un des ware die Männer, die wu selmols die Bilanzsumme vun der Erste Jahrmarkter Sparkassa Aktiengesellschaft zu verantworte hadde: Andreas Wilwerth (Buchhalter), Michael Berger (Direktor), Andreas Wanyer (Kasseer). Die annre Direktoriumsmitglieder ware: Peter Loris, Leopold Loris, Kristof Wagner, Nikolaus Schneider, Nikolaus Hupp, Johann Busch, Josef Klein, Stefan Schmidt, Franz Junginger, Nikolaus Klein, Matthias Blasy un Peter Knecht. Des Gremium is awwer noch vu ‘me Aufsichtsrat kontrollert wor. Un der hot festgstellt, dass „vorstehender Vermögensausweis, als auch Verlust- und Gewinn-Konnto wurden mit den Haupt- und Nebenbüchern verglichen und mit denselben übereinstimmend als richtig befunden.“ Unnerschrieb hun dee Befund die Herre Matthias Wagner, Sebastian Tesch, Jakob Kaacht un Josef Barth.

So, jetzt kann jeder Altjohrmarker, wu noch am Lewe is, in seim Familiearchiv nohsuche, ob sei Urahn mol Bänker in Johrmark war. Ich brauch des net mache, weil mei Urahne ware immer arme Leit … un ich sin bis jetz net aus de Reih getanzt. Awwer wer waaß? Ich spill jede Samstach Lotto. Oomol hatt ich sogar 200 Lei beim Loz in blic gewunn. Des is awwer schun e gudi Weil her.

Berns Toni