Uf de Reschitzaer Literaturtäch

 

Im Banader Bergland lebt e Mann, der hot ka Ruh im Arsch. Er muss immer was mache, etwas organiseere. Sunst find er anscheinend ka Lewessinn uf dere Welt. Der Mann haaßt Erwin Josef Țigla. Un er is bekannt vun Wien bis Czernovitz. Oons vun seine weithin bekannte Projekte sin die Deutschen Literaturtage in Reschitza. Des muss merr sich mol dorch de Kopp gehn losse: Der Mann organiseert des Treffe forr Schriftsteller un Leit, die wu dee gere beim Vorlese zuhorche – wann ‘s aah manches Mol e bissje onstrengend is, ich moon es Zuhorche - seit sage un schreibe 33 Johr. Des is alles großartich un werd forr uns Johrmarker noch großarticher, wann merr bedenkt, dass desjohr schun es zwatte Mol e Schriftstellerin aus Johrmark dabei war. Asso die Fraa is in Johrmark gebor un hot dort ehre Kindheit verbrung. Jetz lebt se in Deitschland wie alle deitsche Johrmarker – ich nenne se geere die Altjohrmarker. Die meiste Altjohrmarker wisse jetz wahrscheinlich, wenne dass ich Moon: es Bernads Kathi.

Die Deitsche Literaturtäch in Reschitza sin e echti Mammutveranstaltung, die iwwer vier Täch geht. Desjohr hun se vum 4. bis zum 7. Mai gedauert. Do sin Literate aus Rumänien un aus Deitschland zammkumm. Un so e Veranstaltung brauch nateerlich e außergeweenlichi Organisation, annerscht gsaat, e außergeweenlich talenteerte Organisator. Merr kennt jo die Schriftstellerzunft so im Allgemeine. In der ehre Reihe gebt ‘s Schreiwer un Schreiwerinne, die känne norr schwer nohlosse, wann se mol ongfang hun, aus ehre Werke zu lese. Awwer wer so e Literaturfestival seit 33 Johr organiseert, der kennt sei Pappenheimer. Aah desmolrum hat de E. J. Țigla de Zoom straff in der Hand ghat. So hat ich wennichstens - als Video-Zuschauer - de Eindruck ghat. Un weil ich schun verrot hun, wie ich iwerhaupt zu dee Täch kumm sin, will ich net vergesse, druf hinzuweise, dass de E. J. Țigla als Manager aah e echter Schmecker is, asso e gewiefter Schlaumeier. Was hot er sich ausgedenkt? Wann ich die Veranstaltung film un se glei ins Internet stell, wie des in de vergangne Johre de Fall war, noo warte intresseerte Leit schun druf un kumme net zu der Veranstaltung, sondern schaue sich des Literaturspektakel e Taach zwaa späder on. Ich geb zu, dass ich grad so gedenkt hun un im Mai immer mol uf die Homepage vun de Banader Berglanddeitsche ehrem Demokratische Forum gschaut hun. Nicks! Do hucke se un hun Hiitcher uf! Na macht nicks, hun ich mer gedenkt, merr kann jo net alles im Lewe hun. So muss halt aah ich ohne die Deitsche Literaturtäch in Reschitza weider lewe.

Awwer wie haaßt des so scheen: Geduld bringt Rose. Ich hun e zeitlang gewart un noo die Literturtäch iwer dee heiße Summer vergess. Eerscht jetzt im grad so scheene Nohsummer hun ich wedder die Homepage vun de Banader Berglanddeitsche ehrem Demokratische Forum ongeklickt un do schau her: Die Deitsche Literaturtäch in Reschitza ware do – un des vun A bis Z. Mer fallt ‘s jetz gar net in, die Veranstaltung zu bespreche. Schließlich kann jo jeder, der wu neigeerich is, selwer uf der Homepage de FACEBOOK-Link onklicke un sich die sechs (6) Videos onschaue. Awwer Vorsicht: Zeit mitbringe. Weil es wär schad, norr so dorchzusurfe. Immerhin handelt es sich um 807 Minutte Videomatrial – un wertvolles, sehr wertvolles.

Katharina Kilzer alias Bernads Kathi

Screenshot: Berns Toni

Ich meecht mich norr korz uf unser Johrmarker Landsmännin beziehe. Es Bernads Kathi gheert glei in zwaa Videos zu de Protagoniste. Oomol stellt ‘s die Dichterin Barbara Seizinger vor un ‘s zwatte Mol leest ‘s etwas aus seine eigne Arwette – oone vun seine Texte stammt vum Geier Luzi, mit dem wu ‘s mitzamm e Buch iwer Heiser in Temeswar rausbringe werd. Last but not least, son Zeitgenosse heit, frieher hot mer gsaat, es Beste kummt zum Schluss (mer falle jetz die Tortne uf de Johrmarker Hochzeide in). Ob de E. J. Țigla aah an die Redewendung gedenkt hot, waaß ich net, awwer er hot ‘s Bernads Kathi als letzti Leserin uf seiner List ghat. (Noher hot ‘s noch e Doppelnachruf uf de grad selmols verstorbne Schriftsteller Richard Wagner un die Vergabe vum Rolf-Bossert-Preis gewwe.)

Scheen, was es Kathi do geles hot, vum Auswannre un vill vun dem, wu ‘s dabei zrickgeloss hot. E sehr poetischer Text mit Realitäts- un Fiktionsinterferenze. So Texte wirke un rufe sofort aah Reaktione hervor. So haaßt ‘s im Kathi seim Text: „Ich bin in der Tränengasse in Jahrmarkt geboren.“ Dodruf hot mei Fraa, es Efi, sofort reageert: „Des stimmt doch net, des war doch die Zigeinergass.“ Na ja, es muss es jo wissen, weil ‘s selwer in de benachbarte Kleegärter ufgewachs is. Uf jede Fall kann ich zwischen Tränegass un Zigeinergass ka poetischi Dissonanz finne. Un des hun ich meiner Fraa aah gsat. Awwer was mer als ehemaligem Johrmarker Musikant zum Schluss vun der Bernads-Lesung noch gut gfall hot, war de Diskussionstaal. Un aus demm will ich e bissje ziteere:

- E. J. Țigla: Bitte, wenn‘s Fragen gibt, oder Anmerkungen. Sie (B. K.) zusammen mit Jahrmarktern werden ja Anfang Juni ein großes Jubiläumsfest in der Gemeinde feiern. […] Für Reschitza war immer wieder ein Begriff Jahrmarkt, die Loris-Kapelle. Also die Musik. Das waren die Kaszner- und Loris-Kapelle. Also einige der stärksten Blaskapellen der Banater.“

- Bernads Kathi: Auch eine der umstrittensten. […]

- Stimme aus dem Saal: Die Spitziche un die Stumpiche.

- Bernads Kathi: Die Kapellenleiter waren eigentlich Verwandte, sie waren Cousins, haben sich aber so bekriegt, dass sich das Dorf in zwei Parteien teilte. Und die einen nannte man die Spitzigen und die anderen waren die Stumpigen. Also die Spitzigen waren die reichen Bauern und die anderen waren die Handwerker und Mittelständler. Und so bekriegte sich das Dorf gegenseitig. Heute sind sie aber vereint und spielen zusammen [...].“

Literatur un Musik gheere nun mol zamm – forr immer un ewich.

Uf der Schanz, 2023

Berns Toni