Es Bernads Kathi im Interview

 

An Phingste hadde die Banader Schwowe wedder in Ulm ehre Treffe. Heimattage nenne se des un halle ’s e jeds zwattes Johr ab. Des war desjohr aah so. Un weil ’s unner de Landsleit aus ’m Banat aah Leit gebt, die wu sich mit Literatur auskenne, gebt ’s seit paar Johr uf dem Treffe e Lesung. So aah desmol. Die Idee un aah die Organisation forr die Bicherpräsentation stammt vum Bernads Kathi, e Journalistin un Publizistin aus Johrmark. Na gut, des klingt jetz e bissje iwerholl, weil ’s Kathi wie alle onstänniche Johrmarker schun lang nemmi in Johrmark lebt.

Uf so ’re Literaturveranstaltung kann merr aah gude Interviews mache. Un des hun zwaa Deitschi-Sendung-Redakteere vun Radio Timișoara in Ulm aah gemach. Odder war ’s norr ooner? Sicher is, dass schun vier Täch noh dem Treffe in Ulm (23. & 24. Mai) de Radio aus Temeswar in seiner deitsch Sendung glei zwaa Interviews mi ’m Bernads Kathi ausgstrahlt hot.

Es eerscht hot de Adi Ardelean sei Fragen gstellt. Awwer net norr em Kathi, sondern aah noch annre Protagoniste, wie des uf Hochdeitsch haaßt, die wu halt aah an der Lesung mitgemach hun. Awwer die will ich jetz net verrode. Wer ’s wisse will soll sich die BANATER POST, e Halbmonatszeidung aus München, kaafe. Dort steht des bestimmt alles ausführlich drin.

Noo hot ’s noch e zwattes Interview mi ’m Bernads Kathi gewwe. Awwer ob des aah beim Treffe in Ulm vum Daniel Spătaru, so wie ’s in der Ankündigung haaßt, ufgholl is wor, odder ob ’s vleicht aus ’re schun etwas ältrer Sendung dazugschniet is, waaß ich net. Awwer als Radioheerer därf merr schun aah sei Zweiwel hun. Uf jede Fall war des, was es Bernads Kathi em Temeswarer Journalist verzählt hot sehr intressant. Norr dass es sich net um die Bicher aus der Lesung ghandelt hot, sondern meh um die Zeitgeschichte vun de Banader Schwowe ... un vun der literarisch Aufarbeitung vum Faschismus un Kommunismus in Deitschland un in Rumänien.

Wie aah immer, so Sendunge im Radio sin sehr lehrreich. Schad is awwer, dass die deitsche Sendunge vun Radio Timișoara norr acht Täch abrufbar sin. Un zwar do: https://www.funkforum.net/audio/deutsch/. 

Berns Toni