Wann
merr heitzutach die Zeidung ufschlaat, ich moon die Tageszeidunge un net so
Vereinszeidunge wie zum Beispiel die BANATER POST aus München, vergeht kaum e
Tach, wu merr net etwas iwer Mord un Totschlach lese kann. So vill is frieher net
passeert, heer ich oft ältre Leit soon. Kann sein, muss es awwer net unbedingt.
Es kann aah do dron leije, dass es frieher net so vill Zeidunge wie heit gewwe
hot un vill passeert is, vun dem wu merr schun im Nochberschdorf nicks meh
gheert hot. Iwerhaupt in der Zeit, in der es eme Johrmarker Richter alles annre
als gut gang is.
Was
selmols, es soll 1911 gewen sin, passeert is, wär nateerlich längst forr alli
Ewigkeit vergess, wann sich net jemmand, dee odder die ich net kenn, dee Vorfall
ufgschrieb hätt. Ob des jetz aus der Erinnerung ufgschrieb is wor, vleicht
schun sogar aus zwatter odder sogar dritter Hand, odder ob des schun selmols,
wie’s passeert is, festghall is wor, kann ich net soon. (Der Sproch noh, kennt
ich mer schun vorstelle, dass der Text noch net so alt is wie sei Inhalt.) Die
Fassung vun dem Verzählte is in sauwrer Handschrift gschrieb, awwer net
unnerschrieb, un der Mann, wu mer des Schriftstick in’re PDF-Datei gschickt
hot, hot mer aah net verrot, vun wemm er’s kriet hot. Merr kann jo aus der Sach
jetz im nohhinein e spannendi Kriminalgeschichte mache, un ich hun mer iwerleet,
ob ich net ooni schreiwe sellt. Awwer noo hun ich die Schrift ongschaut un nommol ongschaut un mer gedenkt, des wär doch echt unfair der Person gegeniwer, die wu sich
die Mieh gemach hot, des Stick Johrmarker Geschichte ufzuschreiwe. Asso loss
ich’s sein un schreib des Schriftstick einfach so ab, wie’s in meim Computer
gspeichert is, dass annre Leit, dee wu Johrmark noch etwas bedeit, aah was
dervun hun – echt un unverfälscht un net vun meine Spinnereie entstellt. Ich
werr aah bei meiner Abschrift ka Ännerunge, wedder inhaltlich noch
grammatikalisch, vorholle.
1911 wird
nördlich der Bahnüberfahrt nach Cerneteaz eine große Ziegelbrennerei (Fabrik)
erbaut und in Betrieb genommen. 1917 infolge des Krieges treten Schwierigkeiten
auf und Ziegelei wird stillgelegt. Nach dem Krieg wird sie von einem Namens
Bedó gekauft. 1927 wird der Betrieb wegen Unrentabilität entgültig eingestellt.
Danach war die große, tiefe, mit Wasser gefüllte Lehmgrube ein beliebter
Badeort für die Dorfjugend.
Von Ziegeln
dieses Werkes wird manches Haus erneuert oder neugebaut worden sein und die
Steine der Gehwege stammten aus der Ziegelbrennerei. Ein solcher Gehweg war
auch der Anlaß zu einem tragischen Ereignis im Dorf.
1911 wurde die
„Stone-Gass“ (der Gehsteig von der Altgass zur Kirche) gepflastert. Um diesen
Kirchweg zu machen, musste „Rowot“ (Gemeindearbeit) geleistet werden. Die
Mehrner (Mähringer), dies waren Tuchmacher (Weber), die aus Mähren stammten und
auf der Insel (waren die wenigen Häuser, wo einst die Gendarmerie war und jetzt
die Neubauten der Rumänen sind) ihre Häuser hatten. Diese Weber weigerten sich
bei der Pflasterarbeit mitzuhelfen, mit der Begründung, sie seien evangelisch
und haben mit dem Weg für die katholische Kirche nichts zu tun. Auf dies ging
der damalige Richter, Bild Mathias, Hauptgasse, mit dem Bleiersch,
Gemeindediener oder auch Kleinrichter genannt, zu denen um sie zu züchtigen.
Damals hatten die Richter auch das Recht der Züchtigung. Den Gemeindediener
nannte man Bleiersch, weil er hatte eine Peitsche mit Bleikugeln, mit der er
dem Übeltäter 25 auf den Hintern schlug. So sollten wegen Ungehorsam auch die
Mehrner gezüchtigt werden. Diese widersetzten sich und erstachen mit einem
Messer den Richter.
Von da ab ist heute
noch der Ausdruck in Jahrmarkt: „Der ist wild wie ein Mehrner“.
Na , des is mer jo e scheeni Gschicht. Asso, net scheen, hun
ich mer gedenkt un se aah schnell vergesse wolle. Awwer wann ich norr net so
neigeerich wär. (Wie e aldi Fraa, behaupt mei bessri un net vill jingri Hälft.)
Korzum: Ich hun schun wisse wolle, wer der streng Richter in Johrmark war. Un
wenne froot merr in dem Fall? De Junginger
Franz aus der Altgass – entwedder merr froot ne am Telefon odder sucht in
seine drei dicke Bicher. Ich hun ehm e Mail gschickt un er hot mer geantwort,
dass er moont, zu wisse, wer des is, un dass er dee Fall kennt. Nicks annres
hun ich vun dem Mann aah net erwart. Asso hun ich’s Ortssippenbuch der katholischen Pfarrgemeinde Jahrmarkt, Band I, uf
Seit 136, beim Nummre B542 ufgschlaa, so wie de Junginger mer gschrieb hot.
Un wirklich, der Mann is do ingetraa. De Bilds Vedder Maths, wie merr heit noch
soon meechte, wann mer geblieb wäre, vun wu mer herkumm sin, war 54 Johr alt,
wie die „Mehrner“ ne umgebrung hun. Sei Sterwestach is mi’m 29. Dezember 1911
ongewwe. Sei Fraa hot Ursula ghaaß
un war e geborni Stefan. Sie hadde
sechs Kinn ghat, drei hun ehre drittes Lewesjohr net erreicht. Vun dee annre drei
ware zwaa Mäd schun verheirat un ehre Bruder, de Franz, war noch leddich, wie der Mord passeert is. Es Kathi hatt im Johr 1899 de Griese Stoffel gheirat ghat un’s Margret 1908, asso e Johr bevor sei
Vatter in Johrmark Richter is wor (nach Franz
Junginger), de Rippolds Maths. Ich
sin immer neigeericher wor, eerscht wie mei Aldi aah ongfang hot in dee dicke
Bicher zu bläddre un uf mol gsaat hot: „Ach, die sin des.“ Ha, ha, do hot
jemand de Forschergeist gepackt, hun ich mer in de Bussm gelacht.
Um rauszufinne, wer die Nachkommen vun dem umgebrungne
Johrmarker Richter sin, hat ich asso uf drei Familiespure zu wannre. Ongfang
hun ich beim Kathi un em Stoffel. Die zwaa hadde finef Kinn
ghat, vun dee wu zwaa ganz frieh gstorb sin. Vun ehre Nachkommen lewe noh meine
Recherche noch 21 Leit in
Deitschland.
Die zwatt Linie geht vum Margret aus. Ehns un sei Mann, de Rippolds Maths, hadde vier Kinn ghat. (De Maths hot noh’m Margret
seim Tod nomol gheirat un hat mit seiner zwatt Fraa aah e Kind ghat.) Vun ehre
vier Kinn hun zwaa es zwatte Lewesjohr net erreicht. Geblieb sin ehne es Anna un’s Bawi. Die hun gheirat - es Anna
innerhalb vun oom Johr sogar zwaamol, es eerscht de Ehlich Matz un noh dem seim friehe Tod sei Bruder, de Hans; außre jeder Ehe hat’s e Bu ghat,
de eerscht hot so ghaaß wie sei zwatter Mann un umgekehrt – un so weider dazu beigetraa, dass die
Nachkommenschaft vum Bilds Vedder Matz
greeßer un greeßer is wor. Vun der Linie lewe heit noch 20 Leit, aah
all in Deitschland.
Bleibt noch de Franz
mit seiner Nachkommenschaft. Er hot am 4. Fewer 1919, asso glei noh em 1.
Weltkriech es Wagnersch Margret
gheirat. Sie hadde drei Kinn: es Anna,
de Hans (1921 gebor un noo fleert
sich sei Spur im Ortssippenbuch) un’s Mrian.
Weil de Hans un’s Mrian awwer am gleiche Tach uf die Welt
sin kumm, asso Zwillinge ware, gehn ich davun aus, dass de Hans bei der Geburt gstorb is. Un so zeichnet sich aah do wie schun
bei dee zwaa annre Linien e Nachkommenschaft ohne de Nome Bild ab. Vun der Linie hun ich
noch 7 in Deitschland lebende Persone finne känne.
Wann mei Nohsuche, Nohfrooe un Zammrechne einigermaßen
stimmt, noo lewe heit noch um die 48 Persone, die wu soon känne, sie stamme vun
dem Mann ab, der wu in Johrmark mol Richter war un dee wu die „Mehrner“ umgebrung hun. Tragisch is an der Gschicht, dass mi’m Tod vun dem Bild-Urvatter – es hot
in Johrmark aah noch annre Bild-Stämm gewwe – aah sei Nome aus seiner weit
verzweigt Nachkommenschaft verschwunn is. Es war fast wie e Wink vum Schicksal
odder noch e zusätzlichi Strof forr de Bilds
Vedder Matz (14.09.1857 – 29.12.1911), dass de kloon Bild
Hansi zehn Johr noh’m gewaltsame tot vun seim Großvatter net lewe hot därfe.
So war sei Vatter, de Franz, de
letzt Familienamensträger vu’me heit weit verzweigte Stamm, an dem vill, vill
Nome wachse, norr halt em Stammvatter seine nemmi. Vleicht war die Idee mit der
„Peitsche mit Bleikugel“ doch net die best. Awwer wer kann des heit noch
beurteile, 108 Johr noh’m Plästre vun der Stoone-Gass.
Berns Toni
Keine Kommentare:
Kommentar veröffentlichen