„Verschiebe
nicht auf morgen, was du heute kannst versorgen“, saat e
Sprichwort. Un recht hotʼs.
Mer gehtʼs
oft so, dass ich mich zu spät an des Sprichwort erinner. Umso
schänner is es noo, wann ich zufällich uf etwas stoß, was ich
schun längst vergess hatt. Ich hun in meim Computerordnerchaos –
vill is schun uf auswärtiche Speicherpladde ausgelagert – do
unlängst mol noh etwas gsucht un de Ordner „Feuilleton“
ufgemach, un vun dort weider de Ordner „Jahrmarkt“, un noo de
Ordner „Giarmata – Jahrmarkt – Johrmark – Erwähnungen.“ Uf
dem is so allerhand gspeichert, wu merr was iwwer Johrmark erfahre
kann. Was ich eigentlich gsucht hun, is gar net so wichtich. Mer is
beim Iwerflieje vun dee 25 dort gspeicherte Dateie e Titel ins Aue
gfall: Momente
emotionante langa Timisoara. Familia venita tocmai din Brazilia sa
descopere locurile in care s-au nascut bunicii, la Giarmata.
Ich
holl jetz do e bissje weider aus, dass Dehr aah wisst, wu ich
iwerhaupt naus will. De Peter-Dietmar
Leber,
des is de Vorsitzende vun der Landsmannschaft der Banater Schwaben,
hot in seim Rechenschaftsbericht uf der Hauptversammlung vun dem
Verein (Ulm, 8. Fewer 2020) gsaat: „Seit
März 2018 trägt das Bundesministerium des Inneren die zusätzliche
Bezeichnung für
Bau und Heimat.
Vor allem Letzteres hat dem amtierenden Minister Horst Seehofer in
der Anfangszeit viel Häme und Spott eingebracht. Mittlerweile sind
die Kritiker verstummt, denn zunehmend wird erkannt, dass gerade in
unserer globalisierten Welt die Menschen eine Bezugsgröße
benötigen, die unter dem Begriff Heimat fällt. Damit ist noch
nichts über die Definition, aber sehr wohl etwas über die Bedeutung
des Begriffs Heimat gesagt. Auch in diesem Ministerium macht man sich
Gedanken darüber, wie es mit den Vertriebenen und den
Landsmannschaften weitergeht. Bleiben Strukturen bestehen, tragen
Spätaussiedler jetzt solche der Vertriebenen, wie wirken sich offene
Grenzen und neue europäische Institutionen auf dieses Gefüge aus?
Das sind Fragen, die immer wieder auftreten. Und vor allem, wie geht
die Generation der Enkel mit dieser Thematik um?“
Asso
der Artikel, dee wu ich vor schun ball zwaa Johr uf der Homepage vun
der Internetzeidung OPINIA TIMIȘOAREI
funn hun, kännt
ooni vun meh Antworte uf die Frage mit de Engelskinn un ehrem Umgang
mit „unsrer“
Heimat, die wuʼs
nateerlich norrr meh in
unser Käpp
– manche
soon aah in unsre Herzer – gebt, sein. Asso ich gheer jo net zu
dee, dee wu die alt Heimat so am Herz leit, un meine Kinn schun
längst net. Awwer vleicht mol meine Engelskinn. Wer waaß? De
Peter-Dietmar Leber
hot aah ka Antwort druf. E paar Beispiele, wieʼs
sein kännt, hatt er schun parat ghat. Awwer des sin un bleiwe halt
Einzelfälle. So e Fall is aah deer aus der rumänisch Zeidung.
Do
hot im Summer 2018 e Familie aus Sao Paulo in Brasilien in Johrmark
Spure vun ehre Vorfahre gsucht. Gschrieb hot dee Artikel de Radu
Trifan.
Er moont aah glei am Onfang vun seim Bericht: „Auf den Spuren der
Vorfahren zu wandeln, um unsere Vergangenheit zu entdecken, ist ein
Unterfangen, dem nur wenige frönen, aber das uns dazu verhelfen
kann, herauszufinden, wer wir wirklich sind und wie wir dorthin
gelangt sind, wo wir sind.“ Aah der rumänisch Journalist hatt asso
des Gfiehl ghat, dass des, was er in Johrmark miterlewe hot därfe,
nicks Alltägliches is.
Die
Protagoniste vun der Spuresuche ware de Marcelo
Zwecker, sei
Fraa
Paula un
sei Motter
Dulce
Fisler.
Sie hun „Details vom Ursprung ihrer Familie und den Gründen für
die Auswanderung in den 20er Johren“ finne wolle. Die Motter vun
der Dulce
un die Oma vum Marcelo
war die am 10. April 1922 in Johrmark geborni Margaret
Retter Fisler.
 |
| Familie Retter in Brasilien in den 1920er oder 1930er Jahren |
Die
Gäst aus Brasilien hun im Gemeindehaus uffne Ohre funn un in de
Archive suche därfe. Was se dort entdeckt hun, schildert de
Zeidungsreporter so: „Bei dieser Gelegenheit hat das Ehepaar
Zwecker erfahren, dass ihre Großeltern Joan Retter und Suzanna
Kramer hießen und Deutsche waren, die nach dem Ersten Weltkrieg aus
Deutschland nach Rumänien ausgewandert sind. Sie wurden in Jahrmarkt
sesshaft und betrieben Landwirtschaft. Sie hatten eine Tochter, die
Margaret, und weil es extrem schwere Zeiten waren, haben sie
beschlossen, den Versuch zu wagen, ihr auf der anderen Seite des
Ozeans ein besseres Leben zu ermöglichen.“ Die Margaret
hot in ehrer nei Heimat e gewisse Fisler
gheirat – merr muss sich beim Lese vun dem Artikel schun einiges
zammreime -, un e Mädche uf die Welt gebrung, des wu Dulce
getaaft is wor un (laut Artikel) bis heit e Fisler
geblieb is. Dulce
Fisler
hot drei Seehn: Marcelo,
Mauricio
un Christofor.
(Forrwas de Marcelo
sich jetz awwer Zwecker
schreibt,
waaß ich net. Vleicht hot er de Nome vun seiner Fraa ongholl odder
sei Vatter haaßt aah so.)
Zum
Schluss erfahrt de Leser noch, dass Margaret
Fisler
im Johr 2003 gstorb is, „ohne ihre Heimat wiedergesehen zu haben“
Des
is doch e scheene Artikel forr uns Johrmarker, aah wann dem
rumänische Zeidungsmann des oone odder annre ausʼm
Rudder gelaaf is. Ich moon, des mit der Einwanderung uf Johrmark noo
em Eerschte Weltkriech muss merr nemmi kommenteere. Ich hun liewer
mol im Johrmarker Ortssippebuch nohgschaut.
Un
des hun ich funn: R308 - Retter
Johann,
* Jm. 13.04.1888 (Paul R. u. Anna Bäumchen) HNr. 661, > R294 <
∞
Jm. 24.11.1921 Krämer
Susanna, *Jm.
16.01.1895 (Tv. Kristof K. u. Elisabeth Kräuter) HNr. 756, >
K1475< // Kind in Jm. geb. Margareta,
*10.04.1922.
Aus
dee Daten kann merr schun e paar Schlüsse ziehe. Als Eerschtes kann
merr soon, dass die Familie forr die, soon merr mol, Johrmarker
Nohkriegsgeneration – un dabei denk ich an de Zwatte Weltkriech –
unbekannt war. Obʼs
noch sporadische Kontakte zu Verwandte im Dorf gewwe hot, kännt
merr norr rausfinne, wann merr noch weitlaafiche Freindsleit frooe
kännt. Um die ausfinnich zu mache, misst merr sich im Ortssippebuch
vun Johrmark weider dorcharwete. De Retter
Johann
hat nämlich noch sechs Gschwister ghat. Er war es jingste Kind. Sei
ältsti Schwester war 18 Johr älter wie er un is 1943 in Johrmark
gstorb. Alle annre sin net alt wor. Un vun der Seit hat es Margareta
eigentlich norr oone Kusin ghat. Des war de Reck
Michael.
Awwer dem sei Spur vleert sich aah noh seiner Hochzet im Johr 1902
mit der Jung
Johanna.
Des haaßt de facto, dass es Margaret
Retter Fisler vun
seiner Vatterseit so gut wie sicher ka Verbindung meh noh Johrmark
ghat hatt.
Un
wie schautʼs
mit der anner Seit aus? Schun etwas besser. Krämer
Susanna,
in Johrmark wahrscheinlich es Krämer
Susje,
war‘s siwete Kind vun nein in seiner Familie. Finef vun dee hunʼs
heiratsfähiche Alter erreicht. Wieʼs
Margareta,
in Johrmark war des es Margretche,
im Johr 1922 uf die Welt kumm is, hatʼs
finef Kusincher un Kusine ghat. Merr sollʼs
jo net moone, awwer es is so, dass aah vun der Linie noh meiner
Recherche wahrscheinlich norr meh wenich Persone lewe. Ich hun in der Linie es Inge
Krämer,
gebor 1977 uf‘m Iwerland, funn. Wieʼs
heit haaßt, waaß ich net, un obʼs
Familie un Kinn hot aah net. Die wäre noo die letzte lebende
Verwandte vun de Familien Zwecker
un Fisler
aus Sao Paulo. Es kännt aah sein, dass em Inge
sei Eltre noch lewe: de Krämer
Josef,
1936 in Johrmark gebor, un sei Fraa Anna, e geborni Kästner,
aus Eichenthal im Banater Bergland. Awwer Genaues hun ich im Ortssippebuch net rausfinne känne.
Wann
merr sich des jetz so dorch de Kopp gehn losst, noo muss merr schun
zugewwe, dass des ganz scheen wenich is, was do vun ooner Johrmarker
Verwandtschaft iwrich geblieb is. Erkläre losst sich des mit der am
Onfang vum 20. Johrhunnert noch ziemlich groß Kinnersterblichkeit,
mit de Folgen vun zwaa Weltkrieche un der oon odder anner Heirat in
annre Ortschafte. Des kann merr alles scheen zammstelle, wann merr
sich die Zeit hollt un im Johrmarker Ortssippenbuch Schritt forr
Schritt die dort in Zahle festghallne Schicksale verfollicht.
Un
dabei werd merr aah net verläugne känne, dass es forr die Generation vun de Engelskinn gar net so leicht is, noh ehre Vorfahre in alte
odder neie Archive (Ortssippenbicher) zu suche. Merr muss do schun e
Portion Neigeer un vill, vill Geduld mitbringe. Awwer wann merr dabei
aah noch mit der richtich Portion Fantasie ausgstatt is, noo kann so
e Nohforsche spannend wie e gut gschriebne Roman sein. Wichtich is,
dass merʼs
Nohsuche net zu lang verschiebt, sunst gerotʼs
schnell wedder in Vergessenheit.
Anton
Potche
Keine Kommentare:
Kommentar veröffentlichen