Schun seit Johre horch ich die deitsch Sendung vun Radio Temeswar. Die werd alle Tach ausgstrahlt un merr kann
se sogar noch siwe Täch noher heere uf
http://www.funkforum.net/audio/deutsch/ . Länger awwer net. Es sei denn, merr lad se sich runner, des geht
aah. Nateerlich horch ich net jede Tach, awwer zwaa Schwerpunkte hun
sich in meine Guste rauskristalliseert,
so dass ich proweer, die zwaa Sendunge net zu verpasse: mittwuchs die
Kultursendung un sunntachs die Unnerhaltungssendung mit Beiträch im
schwowische Dialekt. Des erinnert mich immer e bissje an die PIPATSCH
aus unsrem Lewe vun gester.
In dem Winter war des wegen dem
Corona-Miststick sogar etwas leichter, weil merr halt meh dahoom sein
hot misse. Do kummt am jo so allerhand in de Kopp. Gehst mol hoom,
hun ich mer a‘me Sunntach gedenkt, awwer wirklich hoom, nunner
hoom, dort wu du es eerschte Mol e Mädche gekisst host. Wer war des
norr? Ja Herrschaft, sin ich schun so vergesslich? Ich war momentan
so verärjert, dass ich schun druf un dron war, mei Fraa zu frooe,
wer des denn war. Awwer noo hun ich doch druf verzicht un mer die
deitsch Sendung vun Temeswar uf‘m Computer onkorcht.
Un
des hot sich an dem Sunntach noo aah wirklich ausgezahlt. Mer is
während der Sendung zwar nicks vun meim eerschte Kuss ingfall, awwer
ich hun mich an die Kaschpersch Wess Mrijan
erinnert, die Johrmarker Heimatdichterin, die wu mer selmols im ʼ72er
mei Kerweihspruch gschrieb hot.
Es
war am 4. Advent. Die Temeswarer Redakteerin Helen Alba hot
in der Rubrik Daheim und
unterwegs - Durchs
Banat mit Helen Alba
i‘me Fietscher
(herrisch haaßt des
Radio-Feature) an die
Kaschpersch Wess Mrijan
erinnert. Uf die Idee hot de Geier Luzi
se gebrung. Wortwärtlich
hot die Frau Alba,
sie is jo aah Dialektdichterin un -schriftstellerin un macht heit
noch die PIPATSCH in der Temeswarer BANATER ZEITUNG, gsaat:
„Unlängscht han ich e Schreiwes kriet vum Vedder Luzian
Geier. Der is Journalist in
Deitschland, awwer er stammt aus Johrmark. Un
er schreibt: Die Ebnersch Wess Marjan
wär desjohr 100 wor. Die Johrmarkerin hot frieher zu de fleißiche
Mitarweiter vun der alt PIPATSCH gheert. Gedichter, Gsetzle, Sprich,
Gschichte, Lieder un sogar e greeßres Theaterstick hat se gschrieb.
Des is aah gspillt
gin. Schreiwe war forr des Dorfkind e Stick vun ihrem Lewe, in dem se
halt drin war. Die Kleenheislertochter is am 5. Mai 1920 gebor un
2007 hat se sich verabschied vun dere Welt in Deitschland in
Crailsheim. Gschrieb hat se
bis zuletscht, immer in ihrer Muttersproch.“ Noh hot die Helen
Alba noch e Gedicht vun der
Wess Mrijan vorgeles:
Zum Advent.
Scheen!
Merr hot wedder mol gsiehn, wie eigenstännich e Dialekt is. Die
Helen Alba stammt aus
Bogarosch, un des heert merr
sofort an ehrem Dialekt. Er klingt nateerlich net so wie de
Johrmarker. Un aus der Wess Mrijan
is die Wess Marjan
wor, un aus der Kloonheislertochter die Kleenheislertochter. Un die
Kaschpersch Wess Mrijan
war
uf mol die Ebnersch Wess Marjan.
Awwer vun wu soll die Bogaroscher Dichterin des alles wisse. Des sin
halt die dorfinterne Besonderheide, die wu uns Johrmarker vun alle
annre Banader
Schwowe unnerscheide … un sie vun uns.
Noo
war die Sendung rum. Ich war dehoom … awwer wer des Mädche war,
waaß ich bis heit net. Ich moon, ich froo doch noch mei Fraa, weil
in Johrmark hot doch e jeder gewisst, wer grad wemm sei Gatschika
oder wer wemm sei Haber is.
So, jetz gehn ich un froo
se. Passeert was passeert
...
Berns Toni
Keine Kommentare:
Kommentar veröffentlichen