Ooni vun de gude Seide vum Internet is, dass merr ab un zu etwas sucht un glei beim Inschalle uf etwas trefft, was am faszineert un zur Folge hot, dass merr dort bleibt. Do unlängst is es mer wedder so gang. Ich hun in der BANATER POST - falls es e Banader Schwob gebt, der des noch net waaß, die Zeidung werd in München forr die Banader Schwowe in der ganz Welt gemach – e lange un intressante Artikel iwwer die 31. Auflage der Deutschen Literaturtage in Reschitza geles. Un ganz zum Schluss steht der Satz: „Von der Veranstaltung ist eine Videoaufzeichnung auf der Facebook-Seite des Demokratischen Forums der Banater Berglanddeutschen zu sehen.“
Asso nicks wie nin in die Homepage vun de Berglanddeitsche un vun dort uf ehre Facebook-Seit. Die war zum Glick aah noch noh‘m Facebook-Kollaps do. Awwer ich sin glei bei‘me annre Video mit zwaa Taaler hänge geblieb un hun‘s net gschafft, weider zu suche. Des war awwer ka Problem, weil so etwas kann merr jo dank der nei Kommunikationstechnik nohholle.
Die zwaa Videos, 36 un 46 Minutte lang, hadde de Erwin Josef Țigla im Mittelpunkt. Un weil in der BANATER POST (Nr. 19 vum 05.10.2021) glei newer dem Artikel mit de Literaturtäch aah e korzi Mitteilung mit dem Titel Zum 60. Geburtstag – Ehrungen für Erwin Josef Țigla gstann hot, war ich nateerlich neigeerich. De E. J. Țigla is jo, was merr so heert un lest, es Herz un die Seel vun de Deitsche Literaturtäch in Reschitza. Der Mann is gelernter Bibliothekar und arwet (anscheinend sehr, sehr fleißich) als Kulturmanager, Rausgewwer un Buchautor. Des sin eigentlich schun Gründe genuch, zuzuhorche, wie er sich mit der Moderatorin vun RADIO ROMÂNIA REȘIȚA unnerhalt. Ich will jetz do gar ka Langes un Braades iwer des sehr intressante Gspräch onfange, weil do kännt merr vill driwer schreiwe. Der Mann hot e Haufe Grütze im Kopp, un so groß is Reschitza aah net, dass merr sich net kenne mächt. Asso ware Moderatorin un Gast sich net fremd. Die Situation hot dazu beigetraa, dass merr sowohl aus‘m Gesellschaftslewe vun Reschitza un em ganze Banader Bergland wie aah aus‘m Privatlewe vun dee zwaa Protagoniste im Studio so einiges erfahr hot.
Awwer jetz fang ich doch on, ins lange Verzähle zu ritsche. Asso mache merr‘s korz. Noh so ca. 60 Minute hot de E. J. Țigla gsaat: „Reschitza hot mit zwaa Lunge gelebt: es Hüttenwerk un‘s Maschinebauwerk. Reschitza, die Mensche vun Reschitza hädde ohne die zwaa Lunge net existeert. Aus dee zwaa Lunge is alles entstann. […] Mer all hun hinner uns Generatione, die wu ehre Beitrach zum Ufbau vun der Stadt an der Bârzava geleist hun.”
Scheen gsaat. So denkt merr an sei Vattre, Großvattre un noch weider zrick. Mer is dabei e Gedanke, eigentlich norr zwaa Wärter, dorch de Kopp gschoss: „Iwer Land“. Domit verbunn sinn Erinnerunge an Verzählcher vun meim Vatter. Er is gelernter Zimmermann un hot in de 50er Johre beim Trust un bei der TRCB in Temeswar gearwet. Un vun dort is er mit annre Arwetskullegre uf Reschitza gschickt wor, asso „iwer Land“. Ich war, wie er des verzält hot noch zu jung, um so neigeerich zu sein wie heit. Un ne jetz nochmol ausfrooe, macht wenich Sinn, weil er jo doch schun sehr, sehr vergesslich is. Awwer ganz vage kann ich mich erinnre, dass er verzählt hot, dass se an de Hochowe gearwet hun - wahrscheinlich Krist ufgstellt odder Schallunge gemach. Un er hot aah verzählt vun ooner Fraa in der Kantin im Hüttenwerk, die wu ehne, de Bauleit aus Temeswar, bei der Esseausgabe immer gude Porzione gewwe hot.
Asso e bissje hun aah Banader Schwowe vun der Haad un Heck zum Ufpumpe vun dee zwaa Reschitzaer Lunge beigetraa. Un dass bei so'me Projekt Johrmarker Zimmerleit (vleicht ah Maurer) net fehle hun känne, versteht sich vun selwer.
 |
| Screenshot: Berns Toni |
Keine Kommentare:
Kommentar veröffentlichen