E Johrmarkerin bei de Deitsche Literaturtäch in Reschitz

Ich hat eich doch gsaat, odder besser, gschrieb, dass ich die Gschicht vun de Reschitzer Literaturtäch zu jeder Zeit nohholle kann. Des hun ich in der letzt Wuch gemach. Siwe (7) Videos mit insgesamt 14 h, 30' un 40" Literatur hun ich mer ongschaut. Was mei ongetrauti Fraa dazu gsaat hot, holl ich mit ins Grab.

Vum 16. bis zum 29. August im Corona-Johr Nr. 2 hot des Literaturfestival in Reschitz gedauert. Mit Masken. Wann merr vor zwaa Johr so uf die Sparkass gang wär, hädde die sofort Alarm ausgeleest. Heit losse se dich annerscht gar nemmi nin. Wann Zeide fruckt sin, no sin se des grindlich. Unnrem Maskenschutz in der Alexander-Tietz-Bibliothek in Reschitz hun sich Hochkaräter un mer unbekannte Autore aus der deitsch Literaturszene aus em mittel- un südosteuropäische Raum beweet. Awwer gsiehn hot merr ehre Gsichter jo irgemdwann doch … beim Lese.

Die BANATER POST hot jo ausfeerlich driwer bericht. Na gut, forr iwer alles, was an dee siwe (7) Termine geles un gsaat is wor, zu berichte, hot die Zeidung ka Platz ghat. So is zum Beispiel net in der Zeidung zu lese, dass es e Grundsatzdebatte iwer „Zigeiner odder Roma“ gewwe hot. Un dass am Sunntach korz vor Mittach e junger Dichter aus Temeswar gemoont hot, er hätt „Menschenverachtung“ iʼme Buch vun der Ilse Hehn (die war net dort) funn. Des hot zu Irritatione beiʼre Grupp Autore, die wu aah im POP-Verlag veröffentliche – dort is der Ilse Hehn ehre letztes Buch ufgeleet wor –, gfeehrt. Awwer gut, geraaft hun se net.

Kilzer Kathi

Screenshot: Berns Toni

Umso friedlicher war am Samstachnammitach die Lesung vum Kilzer Kathi alias Bernads Kathi aus der Johrmarker Zigeinergass. (Forr all die, die wu moone, ich därft des net soon, is des nateerlich die Roma-Gass. Odder die Sinti-Gass? Besser die Sinti-un-Roma-Gass in Johrmark. Allerdings haaßt die Gass heit Strada Ardealul. Un dort im Ardeal gebtʼs heit aah noch Zigei … Pardon! … Roma. Awwer des macht jo nicks.)

Es Kathi hot Gedichter vun der rumänisch Dichterin Ana Blandiana geles un aah e bissje vun dem Buch, des wu ehns rausgewwe hot (Herr der Mühle. Gedichte - Pop-Verlag) verzählt. Ehns selwer hot aah e paar vun de Gedichter im Buch iwersetzt. Aah ausʼme zwatte Buch hotʼs noch vorgeles un driwer verzählt: Kristiane Kondrat, Bild mit Sprung. Erzählungen, (danube books, Ulm 2021). Es Kathi hot sei ganze Auftritt in ruhicher, freindlicher Art absolveert. Sei Vortragsart war gemietlich fließend wie e stiller Fluß in der Ebene, awwer net leierhaft, un, ganz wichtich, ohne iwertriebni Emphase, wie manche Leserinne un Leser des so an sich hun. Es Kathi hot e liebenswürdichi, einnehmende Art miʼm Publikum iwer odder dorch de Text zu kommunizeere. Des war e rundi Gschicht, meecht ich soon, un forr uns Johrmarker meh e Grund, stolz zu sein uf unser Literaturfraa aus der Zigei … Pardon! … Strada Ardealul in Johrmark … Pardon! … Giarmata.

Berns Toni