Es Triptychon aus Giarmata

Dr. Markus Fischer stellt in AKZENTE, der deitsch Sendung vum rumänische Fernseh, Bicher vor. Des hot er am 2. Dezember 2021 aah mit dem Bildband Stefan Jäger vun der Kunsthistorikerin un Schriftstellerin Annemarie Podlipny-Hehn gemach. Die Texte in dem Buch sin uf Deitsch un Rumänisch verfasst un de Dr. Fischer hot nateerlich net norr iwer die Bilder, sondern aah iwer des Gschriebne in dem Buch geredd. Sei Sendebeitrach haaßt Bücher und Bilder.

Jetz muss merr awwer wisse, dass die Ausstrahlunge vun de deitsche Sendunge mit rumänische Iwersetzunge laafe; asso die Redebeiträch sin rumänisch unnertittelt, wie des in der Fernsehfachsproch haaßt. Do kummt‘s schun mol vor, dass em Iwersetzer der oon odder anner Tippfehler passeert. Manchesmol känne aah gräwwre Schnitzer passeere. Awwer Fehler mache is doch so menschlich un manchesmol sogar recht lustich.

Dr. Markus Fischer

Screenshot: Berns Toni

De Dr. Fischer hot gsaat, dass de Stefan Jäger beriehmt is wor dorch sei „Einwanderungsbild aus Gertianosch“. Do hot er recht, weil, wie merr nohlese kann, is des Bild im Johr 1910 während ooner Gewerbeausstellung in Gertianosch enthüllt wor, asso es eerschte Mol em Publikum gewies wor. Iwersetzt hun die Sendungsmacher, wahrscheinlich de Tiberiu Stoichici (Redaktion & Schnitt), awwer so: „o lucrare comandată de șvabii din Giarmata”.

Do hun ich vor lauder Lokalpatriotismus mol wedder de Arsch in die Seit kriet. Es is doch bemerkenswert, mit was alles merr Johrmarker Schwowe in Verbindung bringt: sogar mi 'm berühmteste, sozusoon identitätsstiftende Bild vum Stefan Jäger, es Triptychon Einwanderung der Deutschen in Südungarn - wann 's aah net stimmt, un der Iwersetzer aus Gertianosch Giarmata un net Cărpiniș, wie 's richtich geween wär, gemach hot. Wichtich is, merr traut dem Nome Giarmata schun einiges zu – sogar e Kunstmäzenatentum. Do schau her!

Berns Toni