E bissje was aus der Johrmarker Geschichte

 Aus alde Zeidunge

Politik werd oft net dort gemach, wu se wirkt. So hot aah in Johrmark wahrscheinlich ka Seel dron gedenkt, des Dorf im Johr 1920 de Rumänre zu gewwe. Des ware selmols Entscheidunge, die wu in Bukarest un Alba Iulia un letztendlich in Trianon gfall sin. So e Grenzverschiewung speert merr oft noch Johre denoh.

Zum Beispiel in Johrmark. Im Johr 1926 hot ‘s Banat, so wie mer ‘s heit kenne, zum Verwaltungsgebiet Temesch-Torontaler Komitat gheert – asso net ganz genau, so in Großem un Ganzem. Un des Komitat war ufgetaalt in sogenannte Stuhlbezirke. In der BANATER DEUTSCHE ZEITUNG hot merr selmols folgende Information kriet: „Das Komitat besteht aus 12 Stuhlbezirken: Busiasch, Kischoda, Tschakowa, Detta, Gataja, Giulvaz, Hatzfeld, Lippa, Perjamosch, Rekasch, Großsanktnikolaus, Vinga.“ Es is e Bezirk ufgeloss (Neu-Arad) und zwaa neie sin ingericht wor: Hatzfeld un Gataja. Frieher hot ‘s aah noch e Zentralbezirk gewwe, der is umgenennt wor in Kischoda. Es hot bei der Gschicht e paar Verschiewunge vun Ortschafte zu annre Stuhlbezirke gewwe.

Laut Amtsblat hot Johrmark zum Kischodaer Stuhlbezirk mit noch folgende Ortschafte gheert: Kleinbetschkerek, Großberegßo, Neubeschenowa, Cerneteaz, Kischoda, Kovacši, Fratelia, Freidorf, Ghiroda, Giroc, Moschnitza, Paratz, Rautzi, Remetea, Sackelhausen, Sanktandreas, Deutsch-Sankt-Michael, Rumänisch-Sankt-Michael, Schag, Neußentesch, Medvesch und Utvin. Merr kann draus schließe, dass sich forr Johrmark norr de Nome vun seim Stuhlbezirk geännert hot.

Die Stuhlbezirke ware eigentlich e forr Ungarn spezifischi mittleri Verwaltungseinheit. Drum ist es aus heidicher Sicht verwunnerlich, dass merr mit der Verwaltungseinheit noch in Rumänien sechs Jahr noh Trianon gearwet hot.

* * * * * * * * * * * *

Obwohl de 1. Weltkriech schun lang rum war, hot ‘s anscheinend noch immer Kriegsversehrte gewwe, die wu Not gelitt hun. E Aufruf in derselwet BANATER DEUTSCHE ZEITUNG vum 10. Jäner 1926 (e Sunntach) is so formuleert: Spende für den blinden Stabsfeldwebel Jakob Ernst. Aus Johrmark is e anonymi Spende von 100 Lei ingang.

So is des Lewe – aah in der Politik un Verwaltung: Es geht immer weider, do kann die Not noch so groß sein.

Berns Toni