Was merr so alles erfahrt

Ja was merr so alles erfahrt, wann merr alde Zeidunge dorchbläddert. Uf hochdeitsch haaßt des „schmökern“. Ich hun e bissje in e paar Zeidunge aus ‘m Johr 1926 „geschmökert“, asso bissje dorchgebläddert – digital, versteht sich, wie des heit jo „gang und gebe“ is. Un ich muss soon, ich war schun bei der eerscht Zeidung stolz uf uns Johrmarker. Besser gsaat Johrmarkerinne odder noch genauer, uf unser scheene Mäd – die wu ‘s selmols gewwe hot . . . un nateerlich zu meiner Zeit aah noch.

In der BANATER DEUTSCHE ZEITUNG vum 9. Jäner steht e Artikel iwer de „Ärzteball“ in Temeswar. Un merr soll gar net moone, uf was die Zeidungsschreiwer schun damals gschaut hun. Awwer wart mol, forrwas soll merr des net moone, merr sin doch in de berühmte 20er Johre vum 20. Johrhunnert. Do war des normal, was merr in der Zeidung lese kann: „Der Ball war schön, das muss man sagen. […] Drei Musikkapellen in zwei Tanzsälen sorgten für die Tanzlustigen. Es waren etwa 5-600 Menschen dort, so daß alles sich schön verteilt hat. […] Die Abendkleider waren schön und elegant und bestimmt auch hübsch teuer. Für das Auge bot sich ein schönes Bild, den Kranz der vielen Schönen sehen zu können. Als besonders geschmackvoll gekleidet müssen wir die Frauen Bickel, Dutschak, Diel, Hoffmann, Kloß, Leßl – Vojteg, Ellwanger, Schwarz – Hatzfeld, Josephi, Kemeny – Jahrmarkt und von den Mädchen die Fräulein Hollinger, Schmitzer, Keller, Ellwanger hervorheben. Von den Provinzärzten sahen wir Koch – Jahrmarkt, Leßl – Vojteg, Schwarz – Hatzfeld. Der Ball begann mit einem akademischen Viertel nach 10 Uhr. Die vorgeschriebene Tanzordnung trug den Verhältnissen im Banat Rechnung und wurde genau eingehalten.“ Na ja, wann der Zeidungsmensch aah grindlich uf die Weiwer un Mäd gschaut hot, noo gehn ich jetz trotzdem davun aus, dass alles „gesittet“, wie die Herrische soon, zugang is. So schlimm wie in de 20er Johre in Berlin war ‘s bestimmt net. Un aah bei mer bleiwe zum Schluss wie immer beim Reich-Ranicki „Vorhang zu und alle Fragen offen“ . . . Ja, net grad all, awwer zwaa: 1.) Wer war des scheen Mädche odder die Fraa aus Johrmark un 2.) wer kennt de Dr. Koch aus Johrmark? Schwierich. Ich waaß. Die Zeit deckt alles zu. Un 97 Johr sin ka Pappestiel. Do gebt ‘s nemi allzu vill Johrmarker, die vleicht noch vum Dr. Koch gheert hun.

Berns Toni

PS: Jetz muss ich awwer doch nomol zrickkumme. Ich hun die Gschicht do nämlich meiner Fraa verzehlt. Un die hot ‘s Talent vu me Investigativjournalist. Sie hot glei em Junginger Franz sei dicke Schunge rausgholl un ongfang zu suche. So e Ortssippebuch gebt jo doch etwas her, des hun ich schun äfter gsaat. Asso mei bessri Hälft hot rausfunn, dass es in Johrmark e Notar Adam Kemeny gewwe hot. Un dem sei Fraa war selmols, asso im Jäner 1926, grad mol 28 Johr alt, in dem Alter, wu Weiwer (noo meiner ganz perseenlich Meinung) meistens am schännste sin. Awwer de Dr. Koch aus Johrmark hot mei Fraa aah net funn. Er war wahrscheinlich so wie de Notar Kemeny gar ka Johrmarker.