Ich moon, so saat merr des herrisch

Do unlängst hun ich in der ADZ, des is die ALLGEMEINE DEUTSCHE ZEITUNG FÜR RUMÄNIEN, geles, dass es desjohr wedder e „Rolf Bossert“-Preis gebt. De Rolf Bossert war e Dichter. Er hot aah Gedichter in seim Reschitzaer Dialekt gschrieb. Des is awwer schun lang her. Noch net ganz so lang her is, dass er sich in Deitschland es Lewe gholl hot. Er war eerscht 34 Johr alt, wie er des 1986 gemach hot.

Rolf Bossert

Screenshot: Berns Toni

Schad, wirklich schad. Wannst awwer gude Freinde host, die wu dich aah noh em Tod noch ehre un schätze, noo kriest wennichstens e materielles odder e ideelles Denkmal gsetzt. De Rolf Bossert hot so Freinde. Die hun uf Initiative vum siebenbürgisch-sächsische Dichter Hellmut Seiler de „Rolf Bossert“-Freundeskreis gegrind. Un der Freundeskreis hot de „Rolf Bossert“-Gedächtnispreis ausgschrieb. Des war im Johr 2020. Asso gebt ‘s dee Preis desjohr zum finefte Mol. Norr dee kriet merr net einfach norr so, weil merr ne gehre will. Merr muss schun was dafor ton. Un zwar muss merr de sogenannte „Rolf Bossert“-Lyrikwettbewerb gewinne. Des hoost, merr muss siwe Gedichter – selwer gschriebne – inschicke. Un wann merr die schennste un beste – asso drunner geht nicks – Gedichter gedicht hot, noo hot mer gewunn un kriet forr sei Mieh 2000 Euro.

Un jetz, Leit, halt eich fest! Ich hun mer gedenkt, zu so ‘me Gedichterwettbewerb werre so zwischen 20 un 30 Poeten, wie merr uf Hochdeitsch zu de Gedichterschreiwer saat, mitmache. Do hucke se un hun Hietcher uf! Forr dee Verse-Konkurs sin – wann die ADZ net liet – 137 Einsendunge ingang. Wie ich des gsiehn hun, sin ich mei Taschenrechner holle gang, weil so uf ‘m Papier krien ich des nemmi hin. Asso des sin 959 Gedichter. Herrgot steh mer bei! Wer soll denn die all lese? Un wann do noch vun dee moderne aah dabei sin, wu merr net waaß wu forre un hinne is, noo is merr gebenedeit unner de Gedichter.

Asso lese misse se die Mitglieder vun ‘re Jury. Des sin Weiwer un Männer, wu sich mit so etwas auskenne; so wie die Verkoster bei Kochkonkurse. Es beste Esse (noh ‘m Gschmack vun de Jurore) werd noo forr die Lyrikwelt – asso die Gedichterschreiwer un –leser – ufgetraa. Wie so e preisgekröntes Gedichteresse schmeckt, kann merr in dem Zeidungsartikel lese, weil do sin siwe vum Gewinner seine Gedichter abgedruckt. Der Poet haaßt Dietrich Machmer un kummt aus Hamburg.

Wie gsaat, des Ganze bleibt e Gschmacksach. De Jurore scheint ‘s gschmeckt zu hun. Des gilt wennichstens beim Gewinner seiner Dichtkunst. De Preis werd am 27. April in Reschitza, wu vum 26. bis zum 28. April zum 34ste Mol die Deutschen Literaturtage in Reschitza stattfinne, iwerreicht. Dort kumme se noo all zamm, die wu irgendwie etwas mit Literatur zu ton hun - aah die Jurore vum desjähriche „Rolf Bossert“-Gedächtnispreis: Hellmut Seiler, Dr. Olivia Spiridon, Werner Kremm, Bastian Kienitz un’s Bernads Kathi.

Asso, do muss ich schun soon, als Johrmarker känne mer mol wedder stolz sein. Mer hun als Landsmännin e „Literaturkennerin von Format“. Ich moon, so saat merr des herrisch. (Wie's Bernads Kathi herrisch haaßt, wisse die Johrmarker bestimmt - wennichstens die nemmi ganz junge.)

Berns Toni