Wann is merr iwerhaupt e Johrmarker?
Muss merr in Johrmark gebor sein, um sich Johrmarker zu nenne?
Odder langt ‘s, wann merr in Temeswar gebor is, awwer die Eltre,
Großeltre (odder wenichstens e Taal davun) und die Urgukandl, in dem
Dorf nordwestlich vun Temeswar seit ewiche Zeide gelebt hun? Ich moon, entscheidend is, wie merr dazu steht.
Dass es grad e Musikant is, der wu
sich ohne Scheu zu seiner Johrmarker Abstammung bekennt, werd wohl
nimand un schun längst net die unner uns, die wu selwer schun Kinn,
Engelskinn un Urengelcher hun, verwunnre. Der Mann, vun dem wu ich do
schreib, is selwer schun iwer 40, un wann mer in Johrmark geblieb
wäre, wär der Musikant heit e Onsager uf oom vun de Musikantebäler,
odder sogar uf alle zwaa. Merr waaß jo nie, was die Zeit so alles
mit sich bringt.
Uf die Idee wär ich nateerlich gar
net kumm, wann mer net e Kummrad aus meiner Johrmarker Nochberschaft
un Schulzeit e Link fun ‘re Radiosendung vum DEITSCHLANDFUNK
gschickt hätt. Er hot bloß dazu gschrieb: „Ich denke, dieser Link
könnte dich interessieren. Viel Spaß. Ignatz.“ Zis și
făcut, saat de Rumäner, wann etwas ka Aufschub vertraat. Ich
hun dee Link angeklickt un glei uf der eerscht Seit geles, um was es
sich do handelt: „Die Tuba ist Instrument des Jahres 2024. Sie sei
>ein vollwertiges Soloinstrument<, sagt Siegfried Jung.
In Klassik-Pop-et cetera stellt er ihre Bandbreite vor und
unterstreicht vor allem die zarten Seiten des Tieftöners.“
Mer Johrmarker vun anno dazumal
wisse noch genau, wie des war, wann die Blechmusikkapelle mit ehrer
letzt Reih Bäss dorch die Dorfgasse marscheert sin. Dort is ka Gras
meh gewachs, besonders bei de Spitziche. Un jetz die Benennung forr
de Bass: „die zarten Seiten des Tieftöners“. Ich hun sofort
meiner Fraa geruf un em gsaat, dass ich forr die nächste 54 Minutte
un 5 Sekunde net erreichbar sin, ganz gleich wer onruft. So lang werd
die Sendung nämlich daure, hot ‘s dort gschrieb gstann.
Asso ich muss des glei klorstelle,
dass ka Missverständnisse entstehn. Wie ich so in die Sendung
ninghorcht hun, is mer glei ufgfall, dass es net norr um ‘s
Bassblose geht, sondern aah um de Wech, der wu zu so ‘me große un
schwere Blechinstrument feehrt, un dass de Siegfried Jung die
ganz Sendung onsoon werd, so wie selmols vor langer, langer Zeit die
Onsagerinne un Onsager uf der Biehne im Johrmarker Kamin des aah
gemach hun. Norr is des do schun, soon merr mol, e klooni Klass
besser. Awwer des macht jo nicks, es Kamin is jo aah net de
DEITSCHLANDFUNK un die Onsager vun selmols sin aah net gleichzusetze
mit de Moderatore vun heit. Awwer trotzdem hat ich so beim Horche de
Eindruck ghat, dass de Jung Sig jun., so meecht er heit in
Johrmark genennt wärre, die Fußstapfe vun de Johrmarker Onsager
doch etwas ausgetret hot – im gude Sinn, nateerlich.
 |
| Walter Hilgers dirigiert die Philharmonie George Enescu. Solist an der Tuba ist Siegfried Jung. |
Ich
waaß net, wie lang die Sendung noch beim DEITSCHLANDFUNK abrufbar
is, awwer momentan steht se noch im Internet. Es zahlt sich wirklich
aus, se sich onzuhorche. Un zwar do:
https://www.deutschlandfunk.de/klassik-pop-et-cetera-100.html
.
